Manipur-ah uṭok sumdawngtu 4 man

Posted by Lalremlien Neitham

Imphal, July 9, 2014: Zani hmasak July 7 khan Thoubal-a Peoples for Animal (PFA) le Imphal West police hai chun Manipur-a uṭok a sumdawng hlak nuhmei 4 an man.

Uṭok-a sumdawng an um ti an hrietin PFA chun Imphal-a Dingku Road-ah sumdawngna hmunhai dapsuokna beipui an thlak a, mi 4 an man thu le an kuoma inthokin India dan Wildlife Protection Act hnuoia humhim Usai “Indian Bullfrog” an man sa thu an thusuokin a tarlang.

An i man hai kuoma inthoka uisa an dapsuok hai hi leilet-ah an insuoktir nawk vong a, an mi man hai hi Rs. 2000 seng an inchawtir seng bok a nih.

Usai hi lo neituha’n an ching nasa hle a, thimbutin leitlet-ah man dingin an fe suok hlak a nih. Zan khat-ah mi pakhatin usai 50 vel an man tlangpui hlak a, mi 4/5 in thlakhat-ah Usai 40,000 chuong an man hlak anga sut a nih. Usai len dan izirin pakhat-ah Rs. 5-7 velin lakhawmtuhai kuomah zor hlak a ni a, lakhawmtuhai hin bazar-ah hlep neiin an pek sawng nawk hlak a nih.

Sa peltu hai ang loin, Manipur-a uṭok mantuhai hi mi 4/5 vel pawlte-a inṭhe-in uṭok umkhawmna leilet ṭha an zong a; fur huna hai rawpum mei sitin leilet a hai an zong hlak a nih. An meivar chu tuia hai elin, an mei el chun uṭok mit a sukde hlak leiin a mantuhai chun hnotin an man hlak a nih.

Hieng uṭok hai hi Manipur tlangram bazar a hai zor an ni hlak thu hril a nih. Uṭok hi zan-ah manin zingkar inhma deuin tlangram bazar-ah an thon hlak leiin an sumdawngna hi mipuiin an hmu ngainaw niin ei thu lakna chun a hril.

Usai hi State puotienga zor suok hlak ani ti ri a um thu PFA thusuok chun a tarlang a; Usai hai hi rannung pung ding fa zotu an ni thu le pil sukṭhatu an ni thu an tarlang bok a, ramsa le vate ha bu ani thu khom an tarlang bok a nih.


Blog, Updated at: 10:55 AM
© TLÂNGSAM. Powered by Blogger.