Bru raltlan lak kirna thu-ah Bru pawl 2 lungawi lo

Posted by Lalremlien Neitham

Aizawl, July 02, 2014: Mizoram Bru Displaced People Forum (MBDPF) le Tripura Bru camp-a All NGO Joint Committee (ANJC) hai chun thusuok siemin, thla hmasak June 17-23 sunga Mizoram anthoka Tripura-a raltlan Bru hai ṭhuoi kirna chungchang-ah thil indiklo tam tak a um niin an tarlang.

MBDPF leh ANJC hai hin June 30 khan Tripura-a Naisingpara relief camp-ah Bru raltlan hai Mizoram-a lak kirna sin thok 6-na an thlirlet a, Mizoram sorkar-in Bru Coordination Committee (BCC) an thawpui chu ṭha an ti naw thu hrilin; BCC hai chu mani a thuneina inpek chop, mi duam um khawm pawl an ni thu an hril.

MBDPF le ANJC hai chun, Bru lak kir thok 6-naa MBDPF thil phut hai sukpuitling a ninaw thu hai, ṭhuoi kirna sin chu tirdakum hle a an ngai thu le sungkuo ṭhenkhat a hmaa lak kir ta hnung hai lak kir non an um thu hai an hril a; kum 2005-a Bru helpawl BLFM/BNLF inpe tah, hamṭhatna dong ta hai laia hamṭhatna dong sunzom nuom leia lak kir non an um niin an hril bawk.

Hieng Bru pawl pahni hai chun, Bru lak kir thar hai lai hin tuta Bru camp-a um mek hai ration card hming le number hmanga lak kir, a taka card neituhai lak kir ve lo an um niin an hril a, “Lemchang an um leiin sungkuo 13 hai chu Tripura tieng ha’n an ration card le hamṭhatna an suktawp pek ta leiin beidong takin an um mek a nih,” tiin an hril. Lemchanga thil indiklo thawtuhai chu hrem dinga an phut thu an tarlang bok a nih.


Blog, Updated at: 7:26 PM
© TLÂNGSAM. Powered by Blogger.