Zu khapna dan hlip tumna dodalna’n lampui hraw a poster tar tum

Posted by Lalremlien Neitham

Aizawl, July 02, 2014: Mizoram Synod chun, Mizoram sorkar-in zu khapna dan Mizoram Liquor Total Prohibition (MLTR) Act hlip a, a thlakna ding siem a tum an ditnaw ti inentirna’n lampui hraw a, poster tar an tum a; an thiltum thlop dingin Mizoram-a NGO hai khom an fiel bok a nih.

Zani khan Aizawl khawpui sunga Synod Executive Committee (SEC) an ṭhungkhawma, Mizoram sorkar-in MLTP Act hlip a, a thlakna ding dan siem an tum thu an hriltlang a; Mizoram Assembly House-ah put lut ani hma ngeiin a dodalna dingin lampui hraw a, poster tar dingin an rel.

Synod moderator Rev. K Lalhmuchhuaka chun, MLTP Act hlip an ditnaw leiin lampui hraw le poster tar an tum chu sorkar an do lei a ninaw thu hrilfiein, “Sorkar-in kalphung thar a hmang ding hi ṭha kan ti naw thu tlanginsampui kan tum chauh a nih,” tiin a hril.

Zani khan Synod ṭhuoituhai chun Synod Committee room-ah Central YMA, MUP le MHIP ṭhuoituhai khom inhmupuiin an thiltum an hrilpuia, an hmalakna thlop dingin an fiel nghal bok a nih.

NGO ṭhuoituhai chun MLTP Act hlip chu ṭha an ti naw thu hril ve-in, amiruokchu, pawl an ni angin committee thuthlukna an lal tak leiin an committee ha’n an ngaituo hmasa phot a ngai thu an hril. Hieng NGO pathum hai executive committee chu voisun hin inṭhungkhawm an ta, zantieng dar 5-ah Synod ṭhuoituhai leh ṭhungkhawm nawk an tih.

Zani ta inṭhungkhawmnaa khan MLTP Act hlip tum ani nasan chu zu ṭhanaw sorkar-in a’nhnar lei thu hai, MLTP Act-ah hlawtlingna ding dan siem a umnaw thu hai, MLTP Act hlip nuomtu hai chu MLTP Act um hmaa Mizoram a rinum zie hre phalo vong ni a an hriet hai, MLTP Act inthladul ani chun Mizoram-in tuta hma nekin nasa lema a tuor dinga an ringna hai le zu khapna tienga ṭhang lakna hmun hai chu ramin a ṭhatpui lem an ring thu hai hril lang a nih.

Synod SEC chun, NGO ha’n an thlop theinaw ding ani chun lampui hraw lo law law dingin an ti a, poster ruok chu NGO hai hin thlop naw hai sienkhom fetlangpui tho dingin an rel. NGO ha’n an thlop chun lampui hraw dan ding hi zantienga an inhmukhawm nawk huna rel dingin an sie bok a nih.


Blog, Updated at: 7:06 PM
© TLÂNGSAM. Powered by Blogger.