Assam CM chungthu sawtnawte hnung-ah AICC-in rel ding

Guwahati, July 01, 2014: Tulaia Assam-a Congress Legislature Party (CLP) sunga buoina le inzomin All India Congress Committee (AICC) party observer Mallikarjun Kharge chun kar hmasak khan Assam sirin party hotuhai an hmupuia, an hmupuinaa a thil hmudan hai chu zani khan Congress president Sonia Gandhi kuoma a thelut.

Assam-a Congress party hotuhai chun an hotu Tarun Gogoi chungah lungawi loin thlak dingin Congress thlungpui kuomah an zuolko a, an buoina enfel dingin kar hmasak Thawṭanni June 23 khan party observer Kharge inrawina hnuoi-ah AICC chun two-member observer team tirin Assam-a Congress MP, MLA le PCC hotuhai chu CLP sunga buoina thu le inzomin an inhmupui a nih.

Kharge chun an thil hmudan chu AICC kuoma a thelut ta thu hrilin, hmalak dan ding le Gogoi chungchang thu an rel hun ding chu AICC high command kuoma innghat an ta thu a hril.

Tarun Gogoi khingtu pawl hai hi Assam health and education minister Himanta Biswa Sarma tieng hai an nih.

Kum iemanizat anthok ta khan Tarun Gogoi cabinet sunga mi ngei a ditnawtu an um ṭan a, tuta ṭuma Lok Sabha inthlangnaa khan Assam puola Member of Parliament (MP) ṭhungna 14 um-ah Tarun Gogoi ṭhuoina hnuoi-ah Congress-in 3 chauh an chang leiin a khingtu an pung zuol pha a nih.