India-in satellite 5 a kap kai

Posted by Lalremlien Neitham

Sriharikota, July 01, 2014: Zani khan India chun ‘space technology’ tieng a hmasawn ziet inentirin, a i siem rocket ngei hmangin rambung dang hai satellite 5 van boruok-ah hlawtling takin a kap kai.

Zani zing dar 9.52 khan Andhra Pradesh-a Satish Dhawan Space Centre anthokin Indian Space Research Organisation (ISRO) hai siem Polar Satellite Launch Vehicle (PSLV-C23) chun minute 17 le 19 kar dan pei-ah an tum angin hlawtling takin satellite 5 van boruok-ah a’nkap kai a nih.

PSLV-C32 rocket i phur tak kg 714-a rik French Earth Observation Satellite SPOT-7 bakah, rocket hin Germany hai satellite kg 14-a rik AISAT, Canada hai satellite kg 15-a rik ve ve NLS7.1 (CAN-X4) le NLS7.2 (CAN-X5), le kg 7-a rik Singapore hai siem VELOX-1 chu van boruok-ah phurin innghatna ding hmun seng-ah a sie a nih.

India prime minister Narendra Modi khomin satellite kap kai lai hin ISRO hai Mission Control Room anthokin alo thlir ve a, scientist hai kuomah India ṭhenum hnaih rambung hai hmang ṭangkai ve ding South Asian Association for Regional Cooperation (SAARC) satellite siem dingin a cho bok a nih.

“Voisuna space tienga mithiem hung khawm hai hin India ṭhenum rambung hai hmang ṭangkai ding SAARC satellite siem dingin chona ka pek cheu a, hi satellite hin SAARC rambunga ṭhalai hai ta dingin chanṭha a siem pek bakah an ram-in retheina le lekha tiem le ziek tienga an hma lakna khom nasatakin a ṭhangpui thei ding a nih”, tiin scientist hai kuoma chun a hril.


Blog, Updated at: 7:44 AM
© TLÂNGSAM. Powered by Blogger.