Manipur ram humhim dinga intiem thar

Posted by Lalremlien Neitham

Imphal, June 19, 2014: Zani khan Imphal-ah “Great June Uprising, Unity Day” hrietzingna hun nei a ni a, hi hrietzingna ni huoihottu Meitei pawl pahnih - United Committee, Manipur (UCM) le All Manipur United Clubs’ Organisation (AMUCO) hai chun Manipur ramri humhim dingin intiemtharna an nei.

Kum 2001 khan National Democratic Alliance (NDA) inzomkhawmna hnuoia India sorkar-in Naga helpawl NSCN-IM le ramri tiemchin umloa inkapchawl an puong leiin June 18 khan Meitei hai chun nasatakin an do a, mi 18-in hringna an chan a; State Assembly building, CM office building le sorkar building iemanizat raw ani bawk. Hi June 18 ni hrietzingna dingin kumtin “Great June Uprising, Unity Day” nei hlak a nih.

Hi ni a thi hai hrietzingna dingin an thlanmuol-ah parṭhi chawimawina inkhumtir a ni a, Kekrupat-ah public convention neiin Manipur ramri humhim tlat dingin intiemna an nei bok a, UCM le AMUCO hai chun blood donation camp an nei bok a nih.

June 18, 2001 a thi “martyr” hai parṭhi inkhumtirna a hin Manipur deputy CM le home minister Gaikhangam, minister le MLA hai khom an ṭhang a, Congress MP Thokchom Meinya Singh khom a ṭhang bok a nih.

Gaikhangam-in a thuhrilna a chun, "Voisun ni hi hrietzing thlak a ni a, hi ni hin ṭhangruolna a m'inchuktir a nih. Manipur sorkar ngirhmun chu a chienga – tu khomin Manipur ramri le inthuruolna hi an suksiet thei naw ding a nih,” tiin a hril.

Hun nei huna thuhriltuhai chun, United Naga Council (UNC) haiin alternative arrangement an phut bakah, NSCN-IM khomin Manipur anthokin Naga ram hai suikhawm an tum a, Kuki hai khomin Kuki State an hni leiin tuchen hin Manipur ngirhmun chu ala derthawng zing a nih. Iengti kongzawng khomin Manipur keidar tumna chu dang tlat ning a tih, tiin an hril.

UCM president Y. Nabachandra chun, “Hi ni hi ei ngirhmun sukdet zuolna dinga inentirna a ni a, Manipur ram ṭhedar tuma hma lak ani chun thisen luong nawk a tih,” tiin a hril.


Blog, Updated at: 6:18 AM
© TLÂNGSAM. Powered by Blogger.