India le Bangladesh rel lampui 2015-ah

Posted by Lalremlien Neitham

Agartala, June 19, 2014: Zani hmasak Nilaini June 17 khan Agartala khawpui-ah India le Bangladesh ram palai hai chu a ṭum 3-na dingin an inṭhungkhawma, India le Bangladesh ram infepawna ding rel lampui chu kum 2015-a zo hman dingin kum thar anthok khin hma la ṭan dingin thu an sukthluk niin ei thu lakna chun a hril.

Hi rel lampui hi km 15-a sei ning a ta, Agartala le Bangladesh khawpui Akhaurah hai chu rela infepaw thei dingin rel lam chu India-in rem a tih. Akhaurah hi Bangladesh-a rel intuok khawmna hmun poimaw a ni a; Chittagong port, Sylhet le Dhaka hai fepaw theina hmunpui a nih.

Inṭhungkhawmna an nei zo hin, India palai inrawitu external affairs ministry-a joint secretary Alok K. Sinha chun chanchinbumihai inhmupuiin, “Kum thar khin Agartala-Akhaurah rel lampui siem ṭan ning a ta, Detailed Project Report (DPR) chu thlakhat le ti vel sungin zo fel ning a tih,” tiin a hril.

Kum 2010 khan India prime minister hlui Manmohan Singh le Bangladesh PM Sheikh Hasina hai chu India ram-ah inhmuin, India le Bangladesh infepaw theina ding rel lampui siem dingin inremna an lo ziek ta kha a nih.

“Km 15-a sei rel lampui hi India ramah km 5 a tlaa, rel lampui siemtu dingin Indian Railway Construction Company (IRCON) kuta sie a ni a, sengso dingin Rs. 252 crore vel bituk a nih,” tiin Northeast Frontier Railway (NRF) thuneitu pakhat chun a hril.

“Hi rel lampui hin India hmarsak biel hai chu Chittagong International sea port-in zom a ta; India le Bangladesh hai kar inlaichinna ṭha a siem el bak-ah India hmarsak biel hai chu Bangladesh fethlengin Kolkata, Tripura le NE biel haia inzin khom suk olsam lem a ta, sum le inzinna hun khom a suktlawm pha ding a nih,” tiin NRF thuneitu chun a hril bawk.


Blog, Updated at: 9:36 AM
© TLÂNGSAM. Powered by Blogger.