Guwahati hmun-ah "Hmar Hostel-Cum-Community Hall" ding

Posted by Lalremlien Neitham

Guwahati, June 16, 2014: Liemtah Inrinni June 14 zantieng dar 4 vel khan Pu Thanghlun Hmar, IRS, inrawina hnuoi-ah Guwahati-a Hmar Welfare Society ṭhuoitu hai chun Assam Minister (Land & Revenue) Prithibi Majhi chu “Hmar Hostel-cum-Community Hall” thu le inzomin a In ngeia fe-in inhmupuina an nei.

Welfare ṭhuoituhai chun minister kuomah, Guwahati khawpui sunga Circle Officer hai an inhmupui ta thu hai an intlun a, Circle Officer hai chun an area sungah hmun ruok a um ta naw thu an lo hril thu hai minister kuoma chun an hril a. Minister chun HWSG ṭhuoituhai thil beisei chu ngai poimaw pekin, chawp-le-chilin Sonapur Circle Officer chu phone-in a biek nghal a, “Hmar Hostel-cum-Community Hall” bawlna hmun ding bigha khat an pek thei ding thu minister-in alo hril pek niin ei thu lakna chun a hril.

Hi thu le inzom hin welfare ṭhuoitu hai chun hung tlung ding June 17 khin Sonapur Circle Officer an inhmupui nawk ding nia hril ani bawk.


Blog, Updated at: 2:00 AM
© TLÂNGSAM. Powered by Blogger.