Mizoram-ah sumdawngtu mi 3 inrukhmang

Posted by Lalremlien Neitham

Agartala, June 16, 2014: Zani khan Tripura helpawl National Liberation Front of Tripura (NLFT) hai chun Tripura sumdawngtu mi 3 le an driver-pa chu Mizoram sung-ah an inrukhmang niin ei thu lakna chun a hril.

Tripura police chun, “North Tripura-a sumdawngtu mi 5 le an driver-pa chu kar hmasak Inrinni khan an sumdawngna thil le inzomin Mizoram thlang tieng an inzin a, NLFT hel hai hin Tripura le Mizoram ramri anthoka km 20-a hla Mizoram sunga Faileng khuo kawl lampui lai chun sumdawngtuhai motor lo dang chatin, an driver-pa le motor-a chuong sumdawngtu 3 hai chu an inrukhmang a nih,” tiin an hril.

Motor a chuong ve sumdawngtu 2 hai chu hel kut anthokin an tlanhmang hman niin police hai chun an hril bawk.

Tripura police hai chun Mizoram police hai kuomah hieng sumdawngtu inrukhmang hai sansuok dingin ngenna an siem taa, Border Security Force (BSF) khom, NLFT helpawl hai hin India le Bangladesh ramri fethlenga Bangladesh ram an lut thei nawna dingin, inralring dingin an inhriettir niin ei thu lakna chun a hril bawk.

Nikum khom khan NLFT helpawl hai hin hienglai hmuna bok hin Tripura sumdawngtu pakhat le telecom company a thok pakhat an inrukhmanga, thla iemanizat hnungin intlanna sum pek anni hnungin an insuo chauh a nih.

Tripura-a India le Bangladesh ramri lai thirdai siem ani hnung le venghimna ṭha siem ani hnungin NLFT helpawl hai hin Mizoram ramri tieng an che nawk thung nia hril a nih.

Mizoram hin Burma leh ramri km 404 a sei an inṭawm a, Bangladesh leh km 318 an inṭawm bok a nih. Tripura le Bangladesh hai hin ramri km 856 an inṭawm a, hmun ṭhenkhat-ah thirdai le venghimna la sie lo a nih.


Blog, Updated at: 4:19 AM
© TLÂNGSAM. Powered by Blogger.