DU-in UG course kum 3-a dingin thlak kir nawk

Posted by Lalremlien Neitham

New Delhi, June 27, 2014: Delhi University (DU) chun University Grants Commission (UGC) thu zawmin nikum-a under-graduate course kum 4 sunga zo dinga alo hmang ṭan chu kum 3-a dingin voisun khan alo thlak kir nawk tah.

DU vice-chancellor Dinesh Singh chun voisun khan academic session thar chu thawdan hlui ang, kum 3 sunga under-graduate course zo dingin thlak kir nawk ani thu a puong a, DU zom Delhi-a college principal hai kuoma chun kum 3-a ding under-graduate admission la ṭan ta dingin a’nhriettir bok a nih.

Tukuma DU hnuoia college 64 haia inchuk nuom inchuklai lakh 2.7 vel an um a, ṭhungna ruok zat ruok chu 54,000 chauh a nih.

Liemtah Thawleni June 24 khan DU admission thaw ṭan ding ti a ni a, amiruokchu, Pathienni June 22 khan UGC-in DU kuomah under-graduate course chu kum 3-a dingin thlak kir nawk dingin a’nhriettir a, an thlak naw chun UGC anthokin sum ṭhangpuina suktawp ning a tih, tiin a’nhriettir bok a nih.

Singh chun, “UGC anthoka thupek dungzuiin DU chun Four Years Under-graduate Programme (FYUP) chu kum 3-a dingin thlak kir nawk dingin a rel a, admission khom kum 2012-13 academic session fepui dan anga lak ning a tih,” tiin a hril.

Singh chun, DU-in inchuklai hai hmakhuo a ngai poimaw leiin admission khom lak ṭan nghal ani ding thu a hril a, “College principal hai khomin admission thaw zo vat ani theina dingin inchuklai hai an ṭhangpui ngei beisei a nih,” tiin a hril bawk.

FYUP chungchanga UGC le DU hai kara buoina thu a hin sorkar le court hai chu an inrol nuom naw leiin zani khan DU chun UGC kuomah lekha thonin FYUP chu component pahni a thlak dingin rotna a siem a, amiruokchu, UGC chun a ngirhmun a son nuom chuong naw leiin DU chun under-graduate programme chu kum 3-a dingin alo thlak kir ta a nih.


Blog, Updated at: 10:11 PM
© TLÂNGSAM. Powered by Blogger.