Assam-in a hranin intelligence branch indin ding

Posted by Lalremlien Neitham

Guwahati, June 27, 2014: Assam sorkar chun police hai sinthaw a ṭhatzuol theina dingin tiin State police anthokin a hranin ‘intelligence branch’ indin a tum.

Zani khan Assam chief minister Tarun Gogoi inrawina hnuoi-ah a In-ah inṭhungkhawm a ni a; an inṭhungkhawmnaa hin chief secretary Jitesh Khosla, principal secretary (home and political) MGVK Bhana, director-general of police Khagen Sarma le home department le police department-a hotulien hai khom an ṭhang bok a nih.

Gogoi chun Assam sunga ‘intelligence network’ suk hratna ding le police haiin dan kala suolna an dona kong le dan-le-dun an vong ṭhatzuol theina dingin chief secretary chun hma la dingin a hril a, a hranin ‘intelligence branch’ indin dingin a hril bok a nih.

“Fikfiek le helpawl hai dona dingin intelligence lak khawm dan suk hmasawnna ding le chetdan mawi, thiemna le hrietna poimaw bik hai inzirtir a ngai a; intelligence mi-le-sa hai sinthaw a hlawtling theina dingin hmangruo thar le hmangruo changkang hai khom an hmang thiem a poimaw hle a nih,” tiin chief secretary Khosla chun a hril.

“Police sinthawtuhai chu son kuol zing zing an ni hlak leiin intelligence lak khawmna'n a tuor pha hlak a nih. Tuhin intelligence branch-a ding sinthawtuhai chu an sinthaw ding bik le inzomin training pek hlak ning an tih,” tiin DGP Bhanu chun a hril.

Hi intelligence branch hi Intelligence Bureau hai anga indin ning a ta, thoktu hai chu a hrana lak hlak ning an ta, branch a hin ‘superannuation’ chen sie hlak ning an tih, ti a nih.

Gogoi chun chief secretary kuomah, police station hai chu mipui mit lak zawnga siem dingin hma la dingin a hril a, “Mi’n police station a sir phat innghakna hmun ṭha le inhoi tak a hmu chun lungmuong takin police hai ringzo a ta; police hai chun an mawphurna hre-in mipui hai lainaa, nel um takin an um a ngai bok a nih,” tiin a hril.

Chief minister chun, police sin thawtu tak le tamlem constable hai hmakhuo khom ngaiven a ṭul thu hrilin, an umna In le khawsakna hai khom suk hmasawn pek an ngai thu a hril bawk.

Assam sorkar chun police department siemṭhatna dingin dan-le-dun enkoltu le thil suituhai chu a hrana ṭhe dingin hma a lak mek bok a, chu le inzom chun Guwahati khawmpui-ah ‘crime investigation cell’ a hranin a siem ta nghe nghe bok a nih.


Blog, Updated at: 11:55 PM
© TLÂNGSAM. Powered by Blogger.