Mumbai rel chesuol; mi 19 thi, 132 hliem

Posted by Lalremlien Neitham

Mumbai, May 5, 2014: Zani chawhma dar 9:40 vel khan Mumbai anthoka 120 vela hla, Nagothane le Roha rel station inkar-ah Diba-Sawantwadi passenger train chu a chesuol a, mi 19 in an hringna an chan a, 89 an hliem bok niin ei thu lakna chun a hril.

Rel chesuolna hmun hi Maharashtra-a Raigad district huom sunga Nidi khuo kawllai a nih

Hi rel hin bogey 20 a nei a, rel engine le bogey 4 hai chun lungver suok ding char-ah rel lampui an tlan pil leiin rel hi a chesuol nia hril a nih. Rel a hin mi 500 vel an chuong a, coach pakhat hi nuhmei le naupang chuongna bik a ni a, hi coach a hin nu le nau 90 vel an chuong a nih. Passenger tam lem hai hi nipui chawl a inzin tawl an nih.

Rel-a chuonghai hrildanin, rel chesuol anthok darkar 2 hnungin thuneituhai chun sanhimtu le ṭhangpuitu ding an hung tir chauh niin an hril.

Hi rel chesuol hi tulai hnaia rel chesuol lien pawl tak a la nih. Rel chetsuol nasan suidan chun rel lampui hi an sawi leia rel hi chesuol nia ngai a nih. Rel chesuolna hmun lai vela um hai chun rel chesuolna hmun chu an tlung nghal a, police kuomah hrilin an thei ang angin intang hai chu sansuokin sansuokna sin an thaw nghal la, a hliem hai chu Nagothane le Roha hospital a hai chun an phur phei nghal a nih. Rel thuneituhai chun dar 10:40 vel khan hieng lai hmuna hin accident relief medical van le accident relief train hai an tir thu an hril.

Railway minister Mallikarjun Kharge chun mithi sunghai kuomah Rs. 2 lakhs (ex-gratia) seng pek an ni ding thu le a hliemhai chu Rs. 10,000 seng pek an ni ding thu a puong.


Blog, Updated at: 2:12 PM
© TLÂNGSAM. Powered by Blogger.