May 20-ah BJP parliamentary party inṭhungkhawm ding

Posted by Lalremlien Neitham

New Delhi, May 18, 2014: Lok Sabha inthlangna-ah hlawtling taka a party a hratpui leiin May 20 khin Narendra Modi chu India Prime Minister thar sin chel dinga thusam a nei hman BJP parliamentary party hotu lu tak ni dingin formal takin ruot ning a tih.

Zani khan BJP hai thurelna khawl insangtak BJP Parliamentary Board chu inṭhungkhawmin, hung tlung ding May 20 khin BJP parliamentary party inko khawm dingin an rel. Parliamentary Board inṭhungkhawmna hi party chief Rajnath Singh-in a keihruoi a, Modi, LK Advani, MM Joshi, Sushma Swaraj, Arun Jaitley le hotu lien dang dang hai an ṭhang bok a nih.

Parliamentary Board chun, India mipuiin an party an thlangtlingna thu-ah lawmthu an hril a, India economy chu nasataka an ṭhanglien theina dingin hma la dingin an intiem bok a nih. Board chun, Narendra Modi keihruoina le party hotu le sinthawtu ha'n hrat ngei dinga nasataka an campaign-ma kong-ah lawmthu an hril bok a nih.

Rajnath Singh chun thuthar lakhawmtuhai kuomah, "May 20 khin BJP thloptu party hrang hrang inzomkhawm National Democratic Alliance (NDA) hotu hai inṭhungkhawm ning a ta, hi huna hin NDA hotu ding khom ruot ning a tih," tiin a hril.


Blog, Updated at: 1:07 AM
© TLÂNGSAM. Powered by Blogger.