MAP le India sipai ṭhangruolin Burma helpawl bei

Posted by Lalremlien Neitham

Aizawl, May 20, 2014: Pathienni May 18 khan India sipai le Mizoram Armed Police (MAP) ṭhangruolin Burma helpawl Chin National Army (CNA) headquarter an run a, helpawl camp anthok hin ralthuom iemanizat an lak niin ei thu lakna chun a hril.

May 18 chawhnung dar 3 vel khan India sipai le MAP hai chu Mawhro khuo anthokin CNA hai Victoria Camp chu panin an bei a, CNA hel hai tlan hmang san ralthuom 3 an lak pek nia hril a nih. Mawhro khuo hi Mara Autonomous District Council (MADC) huom sunga um, India le Burma ramri laia um a nih.

Police hai thusuok dungzui chun, operation hi Mizoram DGP Lalngheta Sailo keihruoina hnuoia nei a ni a, truck 6-a inphurin, Tuipang le Zawngling khuo a hai chun MAP sipai sie an ni bawk. CNA hai camp an run zo hin MAP sipai hai chun camp-a quarter le bunker hai chu an suksiet pek vong a, zingkar dar 9 velin Lunglei an kir nawk niin an hril.

CNA helpawl a ṭhang man ruok chu an nei naw nia hril a ni a, hliem an um le umnaw ruok chu hriet ani nawh.

India le Burma haiin inhrietthiemna thuthlung Memorandum of Understand (MoU) an ziek hnung khan India sorkar thlungpui chun Mizoram sorkar chu CNA helpawl hai hnotdok dingin a nor zinga, Mizoram sorkar chun CNA hai chu hun tiem pe-in an camp suoksan dingin an ti a, an hun tiem pek a tawp ta leia CNA camp hi an bei nia hril a nih.

CNA hi kum 1988 khan mipui rorelna le mania ro inrel theina nora Burma sipai sorkar do dinga indin a nih. Tuta ṭuma India sipai ha’n CNA helpawl a beina hi a voi 3-na niin, kum 1999 le 2002 khan Assam Regiment hai khomin operation an lo nei ta bok a nih.


Blog, Updated at: 3:18 PM
© TLÂNGSAM. Powered by Blogger.