Garo helpawl mi 5 kaphlum

Posted by Lalremlien Neitham

Willliamnagar, May 21, 2014: Zani zing dar 4 vel khan Meghalaya police-a Special Weapons and Tactics (SWAT) hai chun Garo helpawl United A’chik Liberation Army (UALA) hai commander-in-chief Norrok X Momin In an run a, inkaptuona-ah UALA a ṭhang mi 5 an thi a, sub-inspector pakhat a hliem a, police hai chun hel hai ralthuom iemanizat an dapsuok bok a nih.

East Garo Hills (EGH) district-a Superintendent of Police (SP) Davies Marak hrildan chun, thu an dong dan angin UALA c-in-c Norrok X Momin umna In an hriet lawk thu hrilin, a umna In an va bei lai hin khawsung hmun hrang hrang-ah hel 30 bawr vel an inkul niin a hril.

“Norrok hi an In-ah alo um a, amiruokchu pasal naupangte pakhat phawa hmangin In anthok a suok a, police hai chun an kapzui nuom naw leiin In hnaih laia rambuk hnuoia chun a tlan hmang a nih,” tiin Marak chun a hril.

Tuta ṭuma UALA c-in-c a tlan hmang hi voi 2 police hai anthoka a himna ani tah. Police hai operation hmasak khan UALA helpawl mi 3 kaphlum an ni ta bok a, kha ṭum khom khan c-in-c hi a tlan hmang ta bok a nih.

Police hai chun an khuo beina anthok hin 9mm pistol pakhat, AK-47 pathum, magazine 3, silai mu round 9, silai mu kap hnung 22 le mipui anthoka poisa an hnina lekhabu an dapsuok bok a nih.

Hi operation hi SWAT hai le CRPF-a COBRA police hai ṭhangruola an bei a nih.


Blog, Updated at: 1:03 AM
© TLÂNGSAM. Powered by Blogger.