Manmohan Singh inban

Posted by Lalremlien Neitham

New Delhi, May 18, 2014: Kum 10 zet India prime minister sin a chel hnungin zani May 17 khan Manmohan Singh chun India president kuomah a nina anthokin alo inban tah.

Manmohan Singh-in an banna le inzoma TV hma-ah mipui kuoma a thuhrilnaa chun, tuta ṭuma inthlangnaa mipui rawl chu tuelkhomin inza dingin a ngen a, sorkar thar siemtu ding hai kuoma khom ditsakna le hlawtlingna an hlan nghal bok a nih.

Manmohan Singh chun India president Pranab Mukherjee kuoma a Council of Minister hai inbanna lekha thelut dingin a official residence - 7, Race Course Road anthokin suokin Rasthrapati Bhavan a pan a, president chun inbanna lekha hai chu lo pom pekin, sorkar thar siem hma po a thokpui hai leh an sin la chel sunzom dingin a ngen bok a nih.

Zing tieng khan Cabinet minister hai khom inṭhungkhawmin Lok Sabha suktawp dingin an sukthluk bok a nih.

Manmohan Singh-in prime minister nina a chel ṭum hnina sung (2009-14) khan sum fakrukna thubuoi tamtak um sienkhom, Manmohan Singh chun, “Voi tamtak ka hril ta ang khan ka hringnun le ram ta dinga ka sinthawna chu lekhabu keiphar ang a nih. Ka thei ang tawkin ei ram ropui ta dingin sin ka thaw hlak a nih,” tiin a hril.


Blog, Updated at: 11:30 PM
© TLÂNGSAM. Powered by Blogger.