Manipur-ah bomb puok, IRB pakhat hliem

Posted by Lalremlien Neitham

Imphal, May 19, 2014: Zani khan Manipur Pradesh Congress Committee (MPCC) vice-president Sagolsem Achouba Singh In kawllai bomb a puok leiin 7th Indian Reserve Battalion (IRB) sipai pakhat a hliem niin ei thu lakna chun a hril. Hi thil hi MPCC vice-president In umna Imphal anthoka km 25-a hla Wangoi Makha Thounaojam Leikai-a thiltlung a nih.

Zani zing 5:30 vel khan, MPCC vice-president venghimtu IRB sipai chun raw hmolin plastic bag sunga um bomb (IED nia ring) nullah-ah sunthlak a tumna-ah bomb hi a puok nia hril a nih.

Bomb puok hin IRB-pa kut changtieng a sukhliem a, RIMS Hospital-a enkol dinga fepui nghal niin, a hnungin Shija Hospital-ah son nawk a tih.

Tuta bomb puok hi MPCC vice-president In kawllai a voihni puokna ani tah. Hi thiltlung lai hin Congress hotu le a sunghai chu an In-a hin an umnaw a, an umpui - inenkoltu le venghimtu hai chauh an um nia hril a nih.


Blog, Updated at: 9:19 AM
© TLÂNGSAM. Powered by Blogger.