Aizawl-a Lammual stadium-a ṭhungnahai suksiet

Posted by Lalremlien Neitham

Aizawl, May 03, 2014: Liemtah Zirtawpni zana Lammual-a Mahindra 2 Wheelers Mizoram Premier League Season 2 final inkhelnaa a entu ṭhenkhatin ṭhungna an suksiet a, an ṭhungna suksiet hi 80 vel a tling niin ei thu lakna chun a hril.

MPL final 2nd Leg inkhelna hi mihriem sing chuongin an en a, final a hin Chanmari FC chun Luangmual FC chu 3-0 in an hne a, 1st Leg inkhelna le belkhawmin Chanmari FC chu 4-2 in a hrat lem a, championship an lak ta a nih.

Final match ena lawmman semtu Mizoram Football Association (MFA) president hmasa tak Lal Thanhawla chun, inkhel entu mipui hai chu inkhel inzana nei loa, thil poi suksuok zawnga khawsak an ching pei ding ani chun sorkar-in zana inkhel chungchang hi ngaituo non nawk a tih, tiin a hril. “Tuta hnung pei-ah zana inkhel hi suspend chang um nawng a tih, ti thei an naw a, hienganga thil rohlu suksiet zawnga khawsak hi ei ditnaw a nih,” tiin a hril.

MPL final inkhel lai hin, referee thuthluknaa lungawilo inentirna’n Lammual FC ṭantu hai chun ṭhungna ṭhahnem tawk tak an suksiet bak-ah inkhel sukbuoi zawngin ground sung-ah bottle ruok tam tak an deng luta, venghimtu iemanizat hliem an um bok a nih. Hieng thil lei hin inkhel khom iemanichen sukchawl ani nghe nghe.

Hienganga inkhel entu haiin ṭhungna an suksiet el hi poi an ti thu hrilin, remchang hmasatak-ah hi thiltlung chungchang hi ngaituo le hriltlang ning a tih, tiin MFA ṭhuoitu pakhat chun a hril.


Blog, Updated at: 5:19 PM
© TLÂNGSAM. Powered by Blogger.