11th Hmar Martyrs Trophy Closing le Martyrs day ursun taka inser

Posted by Lalremlien Neitham

CCPur, May 18, 2014 (HT): Ram le hnam ta dinga fam lo chang ta hai hriet zingna dinga kum tina huoihawt hlak Hmar Martyrs Trophy football tournament a vawi 11-na closing ceremony chu May 16, 2014 khan Saikawt khelmuol-ah puithu taka hmang a nih.

Hi huna hin Pu Langkhanpau, Chairman, ADCC khuollienin a ṭhang a, Pu Demmang Haokip, Vice Chairman, ADCC le Pu Lalhossan, EM, ADCC hai chu guest of honour le functional president in an ṭhang. Hi hunser hmangna hi Pu Hrila, MDC le Pu Lalditsang, MDC hai bakah Dr Rochunga Pudaite, Founder President, Bibles For The World le Dr Chaltonlien Amo, Chairman, HAC, Manipur hai khawmin an uop ve a. Hnam sunga pawl tum tuma ṭhuoitu han an uop bawk.

Rev. Lalngailien Puruolte in hun hawng ṭawng-ṭaina a nei zovin Nk. Jeniffer Darrimawi Ruolngul in welcome address a hril a, Pu Lalhrietzing Famhoite, President Hnam Santu Pawl chun keynote address hrilin hnam ta dinga fam lo chang ta hai hriet zingna ding le inunauna ṭha lem a um theina dinga Martyrs Trophy hi huoihawt hlak a ni thu a hril. Hi zo hin Pu Lienhmingthang Varte inrawinain HMARTOP han hnam ta dinga fam lo chang ta hai inzana le lungdawa par inhlanna hunser ursun taka hmang a nih. Uoptu mipui an tam hle a, Hmar Martyrs Trophy tourney hmangta po laia mi an tam ṭum tak la nia hriet a nih.

Hi huna khuollien Langkhanpau in thu a hrilnaa chun, inrem taka um a pawimaw thu hrilin hnam ta dinga fam lo chang ta hai maksan an sung le kuo hai a sunpui thu a hril. Pu Demmang Haokip chun, hiengang hnam ta dinga fam chang ta hai hrietzingna ding le inunauna ṭha a um theina dinga programme huoihawta um chu lawmum a ti thu a hril a, hmatieng peia Hmar hnam sunga inthuruolna le inlungruolna ṭha lem a hung intlun ngei a beisei thu a hril. Pu Lalhossan chun ram le hnam ta dinga thlunglu lo chan ta hai ei hriet zing a pawimaw thu a hril.

Closing ceremony hmangna huna hin Nk. Elizabeth Nk. Clerance Mawite hai bakah Nk. Jeneth L. Varte han hla mawi tak tak an sak bakah HSA Saikawt Unit chun hnam lam mawi tak inentirna an nei bawk.

11th Hmar Martyrs Trophy final inkhelnaa chun B. Aijalon chun FAST, Rengkai chu 2-0 a hnein 11th Hmar Martyrs trophy le lawmmanin Rs. 50,000 an dawng a, runner-up FAST Rengkai chun lawmmanin Rs. 30000/- an dawng a, khuollienin Trophy le lawmman hai inhlanna a nei a, hi zo hin khuollien chun flag down neiin 11th Hmar Martyrs Trophy, 2014 chu a lo tawp tah.

Individual prizes - Best Discipline team in Khawmawi Youth Club le OFC Rengkai hai lawmman pek an ni a, Helun of B.Aijalon chu Top Scorer le Monk (goalkeeper) of B. Aijalon chu Man of the Match lawmman inhlan a nih.

Hmar Martyrs Trophy le inzawma Sinlung Badminton Association in Badminton tournament an huoihawt lawmman semna nei a ni bawk.

Under 15 Boys:
Champion - Paul Pakhuongte (Sielmat)
Runner’s Up - Ginlalmuon Buhril

Men’s Veteran:
Champion - Upa. Lalchelzing Joute (Saikot)
Runner’s Up - Lalrobul Infimate MCS

Open Singles:
Champion - Megnus Joute (Khawmawi)
Runner’s up - Fimrolung Fimate (Sielmat)

Men’s Open Doubles:
Champion - Joseph R Joute (Lamka) & Jose L Tusing (Lamka)
Runner’s Up - Athang Keivom (Saidan) & Megnus Zote (Khawmawi)



Blog, Updated at: 8:30 PM
© TLÂNGSAM. Powered by Blogger.