Sharmila ngenna hnawl

Posted by Lalremlien Neitham

Imphal, April 12, 2014: Kum 13 vel AFPSA khuokhirna hnuoia India rama State ṭhenkhat um hlip dinga bungheia nor fan fantu Iron Sharmila chun Imphal Court hmaa a ngir dingin Manipur Lok Sabha MP inthlangna-ah vote a thlak ve theina dinga phalna a ngen chu hnawl pek a nih.

Sharmila chun, “Phalna pek kani chun inthlangna-ah vote ka thlak nuom ve” tiin a hril a. Amiruokchu, Manipur chief electoral officer O. Nabakishore Singh chun Representation of People’s Act dungzui chun Sharmila chun vote a thlak ve theinaw ding thu a hril. Sharmila hi November 5, 2000 anthok khan AFSPA hlipna dinga bu nghei ta a nih.

IPC section 309 dungzui chun, Sharmila hi mani le mani inthat tumna case inortir a ni a, hi dan dungzui chun kum khat lung ina intang thei a nih. Sharmila hi kumtin lung ina antangzo hin insuo hlak nisienkhom a bunghei a sunzom zing leiin lung in-ah intangtir nawk hlak a nih.

Lung ina inthoka insuo ani nuhnungtak kha tukum March 13 kha a ni a, a bunghei a sunzom zing leiin a zing-ah lung in-ah intangtir nawk nghal a nih. Kum bul khan Manipur CM O. Ibobi Singh chun Congress party zom vea, a thil ngen chu sunzom dingin a fiel a, Sharmila chun a fielna chu a hnawl pek niin a hril.

Sharmila hrildan chu, March 14-a insuo ani khan Manipur CM chun jail-ah hungin anmupuia, Congress party zom dingin a fiel thu a hril. Ibobi Singh chun Congress party zom dingin a fiel naw thu a hril ve thung.

Sharmila chun, Aam Aadmi Party (AAP) anthok khomin candidate-a ngir dingin fielna a hmu thu a hril a, an fielna chu hnawl sienkhom AAP a ṭantu a hril bawk.


Blog, Updated at: 9:23 AM
© TLÂNGSAM. Powered by Blogger.