Imphal, April 12, 2014: Inrinni khan Manipur-a Chandel, Senapati and Ukhrul district-a polling booth 6-ah repolling nei nawk chu tluongtaka nei a nih, hieng hmun haia vote tlazat chu 80% chuong ani thu election thuneituhai chun an hril.
Repolling hi Chandel district huomsunga Lambung le Molnoi, Senapati district huomsunga Keihao Tangkhul, Phaibung Khunou le Kapao-ah le Ukhrul district sunga Sanakeithel a hai sipai 80 seng venghimna khauh tak hnuoi-ah zing 7 anthok chawhnung dar 4 chen nei a nih. Inthlangna nei hmasak April 9 khan hieng polling booth 6 a hai hin polling booth suosamna, candidate hai election agent hai chunga soiselna um lei le vote umzat neka tam vote thlak ani leiin repolling dinga ti an nih.
April 9-a Outer Manipur ṭhungna 1 inchuna a khan vote tla zat chu 84.56% neka tam a nih. Pasal nekin nuhmei haiin vote an thlak ṭha lema, nuhmei vote 3,93,513 a tlat lai pasal vote 3,78,893 a tla ve thung.
Manipur a hin Lok Sabha MP inṭhungna 2 a um a, April 17 khin ṭum 2-na dingin Inner Manipur ṭhungna a ding inthlangna nei ni nawk a tih. Inner Manipur ṭhungna inchu hi mi 8 an um a nih.
Hienglai zing hin Inner Manipur-a Election Observer pakhat Chandra Bhana chu inrinni khan Chandel le Imphal inkar anzin lain stroke leiin a thi thut a, post mortem thawzo ani hnungin voisun khan a ruong hi Lucknow (U.P) tieng phur a nih.
Manipur-a polling booth 6-ah repolling tluongtaka nei
Blog, Updated at: 9:29 AM