Assam MP inthlang ṭum 2-naa vote tla zat 75%

Posted by Lalremlien Neitham

Guwahati, April 12, 2014: Lok Sabha MP inthlang ṭum 2-na a chun Assam-a Karimganj, Silchar le Autonomous District a hai chun inthlangna nei niin, vote tla zat hi 75% vel a nih.

Election Commission chun inthlangna chu buoina taluo umloa nei zo thei ani thu a hril a, EVM 20 vel chu a thok ṭhanaw leiin thlak an ni thu CEO Vijayendra chun a hril.

April 7-a inthlang ṭum khatna constitutency 5-a nei a khan vote tla zat chu 75% vel tho kha a nih. Hung tlung ding April 24 khin Assam-a a ṭum 3-na le inthlang tawpna ding nei ni nawk a tih.

Silchar Lok Sabha MP inṭhungna inchu mi 17 an um a, vote thei zat mi 10,58,870 umin, 66% chuongin an thlak. Polling booth ṭhekhatah vote thlak dinga fe tamtak umhai sienkhom, hmun ṭhekhata ruok chu an tlawm nawk thung. Ṭhenkhat-ah vote neitu haiin an umna khuohai sukhmasawnna dingin sorkar in hma a lak chuongnaw leiin vote nuomlo iemanizat an um bawk.

Karimganj (SC) parliamentary constituency hnuoia Hailakandi district sunga khom buoina taluo um loin inthlangzo thei a ni a, vote tla zat chu 70% chuong nia hril a nih. Hmun ṭhenkhatah party worker hain EVM an lak hmang tum leiin guard hai leh an buoia, guard 3-in hliem an tuok. A hnungin police iemanizat buoina hmun fe in, buoina an chingfel a.

Assam le Mizoram ramri hnaih laia Killarbak polling booth-a chun voter pakhatin ziel a hawp leiin CRPF hai chun mipui hai chu hmoltumin an vuok ni hril a nih. Hailakandi district a hin voter 4,30,744 an um a, polling booths 537 siem a nih.

Haflong LAC sengment 16 a khom buoina taluo um loin zing dar 7 anthokin vote ṭan a ni a, vote umzat 1,34,651 hai lai 59% neka tamin vote an thlak thu dong a nih.

Karbi Anglong le Dima Hasao district keikopa Autonomous District (ST) MP ṭhungna pakhat a chun voter 7,01,267 an um a, 76.79% chuongin vote an thlak nia hril a nih.


Blog, Updated at: 9:30 AM
© TLÂNGSAM. Powered by Blogger.