Aizawl, April 12, 2014: Mizoram chief minister Lal Thanhawla chun, Tripura transit camp-a um Bru raltlanhai chu May 16, 2014 anthoka tiem ṭanin thla 3 sungin Mizoram an kir nuom naw chun Election Commission of India (ECI) chun Mizoram electoral roll anthoka pei dan ding ngaituong a tih, tiin a hril.
April 11-a MP inthlangna nei zo hnunga thuthar lakhawmtuhai anhmupuina a chun Lal Thanhawla chun, “Refugee camp-a Bru hai hi thla 3 sungin Mizoram-ah an hung kir nuom naw ani chun ECI-in Mizoram electoral roll anthoka pei dan ding ngaituong a ta. ECI hi voi iemanizat amani refugee camp-a Bru umhai electoral roll anthoka pei dingin an nor taa, P. Chidambaram la home minister lem sien chu MLA inthlangnaa khom khan vote thlak naw ni hai,” tiin a hril.
Lal Thanhawla chun, refugee camp-a Bru umhai chu kum 1997 anthok khan Mizoram-ah hung kir dinga fiel an ni hlak a, “Kan hnotsuok an ni naw a, voi iemanizat kir dinga kan ngen lem a nih. An hung kir nuom ta naw chun poi kan ti chuong nawh,” tiin a hril.
MLTP Act chungchanga zawna sangin, MLTP Act chu an party-in rem an ti hun hunah hlip ani ding thu a hril a, “Kan party-in a la ngaituo nawh” tiin a hril.
Electoral roll anthoka Bru raltlanhai pei dan ding ECI-in a ngaituo ding: Hawla
Blog, Updated at: 9:27 AM