Tripura-a malaria natna leia thi 60 tling

Posted by Lalremlien Neitham

Agartala, July 04, 2014: Tulai Tripura-a malaria hri inleng nasat leiin mi 60 velin an hringna an chan taa, hmun kilkhawr danga hai khom a’nleng zuol pei niin ei thu lakna chun a hril.

Tripura sorkar chun malaria hri inleng chingfelna dingin hmun kilkhawra hai chun helicopter le special medical team tir a tum a, "Dhalai-a chief medical officer Dr. Sanjoy Biswas chu Kanchanpur sub-division huom sunga malaria natna hri inleng zuol bikna hmun Sakhan Shermoon a hai chun medical camp nei dinga hril a nih," tiin North district-a District Magistrate Sanjiv K. Rathod chun a hril.

“Special medical team hai hi Agartala anthokin fe'ng an ta, Zirtawpni anthokin ni 4 sung an sin thaw ṭan an tih,” tiin a hril bawk.

Tripura North district baka hin special team hai chu helicopter-in Dhalai district hmun kilkhawr a hai fe’ng an ta, medical camp nei bok an tih. Tripura-a district 8 hai lai Dhalai district hi malaria natna hri inleng nasatna hmun tak a nih.

State sorkar khomin malaria hri inleng dona dinga damdawi an nei chu a’ndai ta naw leiin central sorkar kuomah a hlopa pe dingin a ngen ta bok a nih.

Chief minister Manik Sarkar chun, malaria natna hri inleng dona sin thaw mek thlirletna a nei a, health department hotuhai kuomah malaria natna chingfel vat ani theina dingin nasa nawk zuola enfel dingin a hril bawk a nih.

Zani hmasak khan mi 9,136 hai thisen chu lak niin endik a ni a, hieng hai lai hin malaria natna nei mi 1,435 hmu dok a nih. Zani khan malaria natna nei mi 672 hai chu sorkar damdawi in a hai enkol dinga thun an nih. Tripura sorkar chun, malaria-a damnaw enkoltu doctor le medical staff hai chu inenkol dan khauh taka zui dingin a hril bok a nih.

Medicines Sans Frontiers (MSF) hai khom malaria natna hri inleng chingfel theina dingin ṭhangpui an nuom thu Tripura sorkar kuoma an hril bok a nih.


Blog, Updated at: 4:04 AM
© TLÂNGSAM. Powered by Blogger.