July 9 a inthawk New Connection Drive nei dingin

Posted by Lalremlien Neitham

CCPur, July 04, 2014 (HT): Zani 11:30AM khan Mr P.K. Jha, IAS, DC, CCPur inrawinain a office chamber-ah Electric power thuah meeting nei a nih. Meeting huna hin July 9, 2014 a inthawkin Headquarters Veng-a ṭanin Electric New Connection drive thaw ding le a dawt dawta thaw pei dingin an rel.

New Connection Drive thaw huna hin permit nei lova electric la hai ta dingin a fee peka permit nei ding thuah campaign nei nghal ning a ta, a hmuna sum an pek leh hmun le hmunah electric permit peka zawm pek nghal pei ning an tih. Amiruokchu, permit ngaisaklo le sum pe nuom lo hai chu an electric lakna sut pek ning a ta. Sut pek an ni hnunga an lo zawm nawk a ni chun Police leh ṭhangruolin an electric lakna sutpek le a ṭul anga action lak ding tiin an rel.

Hi baka hin Loadsheeding programme mipui hriet dinga puong pei a ni theina dingin Department in hma lang an ta, sukfel zo a nipha Loadsheeding hun hai puong pei nit a dingin an rel bawk. Hun dang le tekhiin tulai hin electric power ei hmu ṭha deu a.

Hi thil hi mi ṭhenkhat chun World Cup lei niin an hril a, sienkhawm World Cup lei ni lovin electric power pesuoktu Hydropower project han peak season a ni leiin tui a tam leia power an peksuok a hung tam lei a nih tiin Mr P.K. Jha, DC, CCPur chun a hril.

Meeting huna hin Electric Department officials hai bakah CCPur Consumers Club, Joint philanthropic Organisation ṭhuoituhai le BO Hq. DC Office hai an ṭhang.


Blog, Updated at: 5:37 AM
© TLÂNGSAM. Powered by Blogger.