Northeast Frontier Railways (construction) hai rel lampui rem mek Silchar-Lumding track hi kum nawk June thla khin zo fel beisei a nih.
Liemtah July 1 khan district thuneituhai chun NF Railways kuomah lekha thonin, Silchar rel station chu km 7 a hla Srikona rel station-ah son dingin rotna an pek a nih.
District DC GM Hazarika chun, Lumding le Maligaon a rel thuneituhai kuomah gauge track zofel a nip hat tuta rel station a hin mi inlon an ṭhahnem ding leiin a rotna hi ngaituo dingin a ngen thu a hril a. Silchar-Lumding rel lampui hi kum nawk May le June vela gauge track a thlak ani hun-ah hieng laia rel lampuia fe inlon an tam ring leia rotna hi siem ni a hril a nih.
Hi thu le inzom hin Additional district DC A. Bhattacharjee khom Srikona khuo kawllai ram enfel dinga hril a ni ta bawk a nih.
Tuta Silchar rel station umna anthoka Srikona-a son ding le rel inkanna kot-a overbridge siem ding hin kum 3 anthok kum 4 vel bek a aw ring a nih.
Rotna hi lo sukpuitling nisienkhom, tuolsung rel ha’n Silchar rel station chu la hmang zing tho an ta; Karimganj, Hailakandi le Badarpur station a hai Silchar anthoka rel ala tlan zing tho ding a nih.
Hi broad gauge track rel lampui hi kum 1998 anthoka ṭan ta nisienkhom sum umnaw lei le helna leiin tu chena la siem puitling lo a nih.
Silchar le Lumding broad-gauge track hi km 201 a sei a ni a, riruong danin Rs. 648 crore a zo dinga ti a nih. Tuhin Rs. 4500 crore a zofel thei chauh ni dinga ring a nih. Hi rel lampui a hin rel station 37 um ding ti nisienkhom rel station 31 chauh um tang a tih. Zofel ani phat, hi lampuia tlan rel hai chu darkar khat-ah km 75 pei tlan hlak dinga ti a ni a; Silchar anthok Guwahati chu darkar 8-9 vel chauh a aw ding ti a nih.
