Shillong-ah Sumo motor chesuol, Hmar 1 thi, 4 ICU-ah

Posted by Lalremlien Neitham

Shillong, July 07, 2014: Voizan dar 6.30 vel khan Shillong-ah Sumo motor a chesuol a; Hmar mi pakhat a thi a, mi 4 dang na takin an hliem bok a nih.

Ni 9 July anthoka Shillong Hmar Youth Association (HYA) huoihotna hnuoia football tournament neinaa thang dinga insingsa Mawsbuit ground-a practice a fe Hmar team pahni - Hmar Thlipui FC le Royal FC hai chu practice an zo an kir tieng Assam Regiment gate kawllai an chuongna Sumo motor a chesuol a, Sumo chu inletin a chunga chuong hai chu a delde niin ei thu dongna chun a hril.

Sumo-ah hi mi 30 vel an chuonga, a chung-ah hin mi 10 bawr vel an chuong nia hril a ni a; a i phur hai a zo naw leiin an letna-ah a chunga chuonghai a del a nih.

Motor changsuolnaa hin tleirawl pakhat Immanuel Lalrokung Sungte (k. 16) s/o Simeon Sungte (Demthring, Shillong) chu Assam Regiment hospital tlungpui ani hma'n a thi a, a dang mi 4 hai chu na taka hliemin Intensive Care Unit (ICU)-ah enkol mek an nih.

Immanuel ruong hi morgue-a sie mek niin, tuhin Shillong HYA thuoituha'n post-mortem nei chuongloa morgue anthoka laksuok dan ding an ngaituo mek a; Madanrting police le East Khasi Hills district DC anthok phalna la dingin an buoipui mek a nih..

A hliem hai hming chu:

Jefenia s/o Remthang Zate
Lallawmzuol s/o Luoia Sungte
Hmangneirum s/o Rotinhmang
Simeon s/o Ruolsumhau
Lalngaidam s/o Rotinhmang
David s/o Lallawmsuong Zote
James Lalramnghak
Jebulon
Jonathan

A then hi an pa/sunghai hming hriet a ninaw leiin, a hrechieng a um an chun HYA thuoituhai inhriettir dingiin ei inngen.


Blog, Updated at: 10:38 PM
© TLÂNGSAM. Powered by Blogger.