Nuhmei chunga kut thlakna NE-ah a pung

Posted by Lalremlien Neitham

Aizawl, July 06, 2014: National Crime Records Bureau (NCB) hai “Crime in India, 2013” report dungzui chun, kum 2012 nek khan ni kum 2013 khan India hmarsak biel State 8 hai lai 6-ah nuhmei chunga kut thlakna a pung niin an hril.

India hmarsak biel State hai lai India pumpui-ah Assam chu kum 2012 ang bokin nuhmei chunga kut thlak tamna State 7-na a’n nawk a nih.

Nuhmei hai chunga kut thlak tamna State Assam chunga um hai chu, an sang taka anthoka indot tla-in - Andhra Pradesh, Uttar Pradesh, West Bengal, Rajasthan, Maharashtra le Madhya Pradesh hai hi an nih.

Kum 2012-a nuhmei chunga kut thlak tamna tak West Bengal chu tuta ṭum a 3-naah a tlahnuoi a nih.

Assam-ah kum 2012 khan nuhmei chunga kut thlakna thubuoi 13,544 zieklut a ni a, kum 2013 khan pungin thubuoi 17,447 a um a nih.

Tripura-a khom 1,559 anthok 1,628 a kai a; Meghalaya-ah 255 anthokin 343; Arunachal-ah 201 anthok 288; Sikkim-ah 68 anthok 93 le Nagaland-ah 51 anthok 67 a kai bok a nih.

Mizoram le Manipur a ruok chu a tlahnuoi ve thung a; Manipur-ah nuhmei chunga kut thlakna 304 anthoka 285-ah a tlahnuoi a, Mizoram-ah 199 anthok 177-ah a tlahnuoi bok a nih.

Assam hin nuhmei chunga kut thlakna hieng pawngsuol, ṭhuoi hmang le inruk hmang, dowry leia that, an pasal le sunghaiin an i vuok le suknomnat thubuoi hai-ah an sangtakna a lak vong a nih.

Kum 2012 khan Assam-a pawngsuol umzat chu 1716 a ni a, kum 2013 khan pungin thubuoi 1937 a um a nih.

A dottu Tripura-ah pawngsuolna 229 anthok 233 a kai a, Meghalaya-ah 164 anthok 183, Arunachal-ah 46 anthok 75, Manipur-ah 63 anthok 72, Sikkim-ah 34 anthok 43 le Nagaland-ah 21 anthok 31 pawngsuolna thubuoi a kai tung a nih.

Hmarsak biel State a hai Mizoram a chauh pawngsuolna a tlahnuoi a, kum 2012 khan 103 a ni a, 2013 khan 89-in a tlahnuoi a nih.


Blog, Updated at: 12:21 PM
© TLÂNGSAM. Powered by Blogger.