Mizoram-ah GSI survey centre

Posted by Lalremlien Neitham

Silchar, July 04, 2014: Kar hmasak khan Mizoram industries minister H. Rohluna-in Durtlang, Aizawl-ah Geological Survey of India (GSI) field training centre bawlna ding lungphumna a nei a, hi centre hi Northeast-a mimkei laka invengdan le ram umdan inchukna hmunpui hmasak, India rama a 12-na ding a nih.

H. Rohluna chun, Union ministry hnuoia indin centre hin Mizoram ram umdan chauh niloin India hmarsak ram umdan hai hrietzauna hmangruo ṭha tak a hung ni a beisei thu a hril.

Lungphum nei huna ṭhang ve GSI director-general SK Wadhawan chun, hi centre hi “world class training centre”-a siem ani ding thu hrilin, “Hi centre-a hin lirinhning le mimkei hai inchukna dingin hmangruo ṭha le changkang tak tak hai sie ning a ta, data lak khawlhai chu geology le geography tienga mithiem le inchuklai hai kuomah pek sawng hlak ning a tih,” tiin a hril.

Rohluna chun, inchukna hmunpui hi buoina um loa bawl zo vat a beisei thu hrilin, tuolsung mi le hmarsak biel ha’n nasatakin an sor ṭhangkai ding thu a hril bawk a nih.

GSI chun kum 2010 anthok ta khan centre le state sorkar-a administrative le engineering department hotuhai chu Mizoram sunga lirhning le mimkei chungchang hai hriet thiemna dingin training a lo pek ta hlak a, tuhin training hai chu Durtlang-a training centre bawl ding a hin neipui ta hlak ning a tih.


Blog, Updated at: 9:34 AM
© TLÂNGSAM. Powered by Blogger.