Jiribam-ah motor 5 suksiet

Posted by Lalremlien Neitham

Imphal, July 08, 2014: Manipur sorkar-in an thil ngen an uksak naw leia Jiribam-a inchuklai pawl hrang hrangin tiemchin umlo a ‘total blockade’ an ko ni 2-na zani khan blockade thloptuhai ni dinga ring hai chun motor inlon 5 an suksiet niin ei thu lakna chun a hril.

Hienglai zing hin bandh kotu inchuklai pawl hai chun an ngenna zawm nuom lo a, passenger la a motor inlontir Kangleipak Counter hai chu tiemchin umloin an khap thu an tarlang a; inhriet thiemna thuthlung ziek ani hma po an khapna an sut naw ding thu inchuklai pawl hai chun an puong bok a nih.

Bandh kotu hai chun, an nuorna inentirnaa blockade an ko hi mipuiin thlop seng dingin an ngen a, a zawm nuomnawtu hai chu an vau bok a nih.

Jiribam-a Meitei inchuklai pawl hai hin Jiribam sub-divison a inchukna hmun suk hmasawnna dingin hmangruo tha le zirtirtu sie belsa dingin Manipur sorkar an ngen a; sorkar-in hun tiemchina sukpuitling dinga a ti an suk hlawtling naw leia nuorna inentirna’n blockade hi an ko a nih.

Motor 5 suksiet baka hin zani zanril lai khan Babupara-a Manipur Pradesh Congress Committee (MPCC) hai Jiribam block office khom hmelhrietlo misuolin an raw vam vong bok a nih. Jiribam police le fire service hai chun thel tumin sin thaw hai sienkhom office building chu a kang siet vong a nih. Police haiin a rawtuhai hi hrietchieng tumin an sui mek niin ei thu lakna chun a hril.

Ni iemanizat liemtah khom khan hmelhrietlo misuolin Jiribam-a ZEO office khom an raw ta bok a; fire service le khawtlang mipui haiin a kangsiet hman an thel hman a nih.

Thla hmasak June 25 khan Jiribam-a AMSU District Committee, MSF Special Branch, DESAM Local Council le Jiribam-a KSA unit hai chun tiemchin umloin sorkar inenkolna office le sikul hai khar dingin an puong a; an thil phut chungchang-ah Manipur sorkar anthok hmalakna a umnaw leiin July 5 anthok khan National Highway-37 lampui-ah ‘total blockade’ an puong bok a nih.

Jiribam sub-division a pawl hrang hrang hai chun hieng inchuklai pawl nuorna hi an thlop ni a hril a nih.


Blog, Updated at: 1:49 PM
© TLÂNGSAM. Powered by Blogger.