India ramah mi 10-ah mi 3 pei mi rethei: Rangarajan panel

Posted by Lalremlien Neitham

New Delhi, July 8, 2014: PMEAC chairman hlui C. Rangarajan keihruoi panel chun Tendulkar Committee-in India ram sung mi rethei umzat report a pek chu hnawlin, mi rethei umzat chu a sut tamlem a nih.

Planning Minister Rao Inderjit Singh kuoma report thelut danin, Rangarajan panel chun India rama mihring cheng hai lai 29.5% chu mi rethei niin an sut. Chu umzie chu India rama mi 10 pei-ah mi 3 hai chu mi rethei an nih.

Rangarajan panel-in a sut danin, India ram-ah kum 2009-10 khan mi rethei 38.2% an um a, kum 2011-12 khan 29.5% in a tla hnuoi a nih.

Hienglai zing hin Tendulkar Committee chun India rama mi rethei umzat chu kum 2009-10 khan 29.8% in a sut a, kum 2011-12 khan 21.9% niin an sut ve thung.

Tendulkar Committee-in mi retheia a tiem chin, khawpuia cheng hai ta dingin ni khat-ah Rs. 33 hmang chin hai a tiem chu Rangarajan panel chun Rs. 47 chin-ah a tiem ve thung a nih.

Rangararan panel hi Tendulkar Committee fepui dan ennon dinga ni kuma indin a nih. Hi panel-in a sut danin khawpuia cheng, thla khata Rs. 1,407 hmang ding nei chin (ni khat-ah Rs. 47) le khawte-a thlakhat-ah Rs. 972 (ni khat-ah Rs. 32) hmang ding nei chin hai chu mi rethei-ah tiemin, hi hi Tendulkar Committee sutna nekin a’n sang lem bok a nih.


Blog, Updated at: 2:57 PM
© TLÂNGSAM. Powered by Blogger.