India ram Hindu rama siem dinga BJP hmalakna ka hriet nawh: Hawla

Posted by Lalremlien Neitham

Aizawl, July 05, 2014: Mizoram Pradesh Congress Committee (MPCC) president le Mizoram chief minister Lal Thanhawl chun, Bharatiya Janata Party (BJP)-in India ram Hindu rama siem dinga hma an lakna tu chena a la hriet naw thu hrilin, “BJP chu India ram Hindu rama siem nuom an ni a, amiruokchu, anni lai a ditnaw tam tak an um ve tho a nih,” tiin a hril.

Lal Thanhawl hin zani khan Congress Bhavan-ah thu a hril a, ram pum huopa ṭong pom chu Hindi le English ani thu hrilin, “An bu le thawsuok ringa khawsa ni si hin Mizo hai hin hnam dang hmusit ei ching a; Delhi tlang-ah sap ṭong le Hindi thiem naw chun harsatna a tam,” tiin a hril.

National Democratic Alliance (NDA) sorkar-in Hindi chu State tin-ah hmang dinga thupek a’nsuo chu Congress sorkar lai khomin insuo ani ta thu a hril bawk.

Supply tieng-ah hma an lak thar mek thu hrilin, Lal Thanhawl chun, “Central ringsan taluo lo dingin sum suksuok kan tum. National Land Use Policy (NLUP) khom hi sorkar thlungpuia sorkar tharin suktawp sien ti ngaituona nei tam tak an um a, amiruokchu, NLUP fepui an tum lem a nih. Tu mani hai changsuolnaa ngir suok tum tlat hi ringtuhai thaw ding ani nawh,” tiin a hril.

MPCC president chun Burma, Tripura, Bangladesh, Manipur le Assam-ah Mizoram sunga um neka tam Mizo an um ti hrilin, Mizoram chu British-in “Sukdar la, op det rawh” an ti tuor nasa taktu ani thu sorkar thlungpui hotu hai a hril ta thu a hril bok a nih.


Blog, Updated at: 1:26 PM
© TLÂNGSAM. Powered by Blogger.