UPF/KNO le sorkar inbiekna August 22-ah

Posted by Lalremlien Neitham

Imphal, June 18, 2014: Hun sawt tak anthoka tuong tah Manipur-a tlangmi helpawl Kuki National Organisation (KNO) le United People’s Front (UPF) hai le Manipur le India sorkar thlungpui kara inbiekna chu August 22 khin New Delhi khawpui-ah nei ning a tih.

Zani khan KNO, UPF le Manipur sorkar hai Suspension of Operations (SoO) Joint Monitoring Group (JMG) inṭhungkhawmna chu 1st Manipur Rifles Banquet Hall, Imphal-ah nei a ni a, hi huna hin “Tripartite Talk” nei ding hi sukthluk a nih.

Hi inṭhungkhawmna hi Manipur sorkar tieng principal secretary (home) Suresh Babu-in an rawi a, KNO le UPF hotu mi 22 an ṭhang bok a nih. UPF tieng JMG-UPF convenor Sanga Hmar-in an rawi a, KNO tieng JMG-KNO convenor Dino Zou-in an rawi bok a nih.

Meeting hi sun dar 11 anthok chawhnung dar 3 chen nei a ni a, hung tlung ding August 22-a New Delhi-a inbiekna nei ding chungchang thu hai hriltlang ani deu tak.

SoO hnuoia um KNO le UPF helpawl hai thlatin hlaw sukpung ding chungchang khom hriltlang a nih. SoO hnuoia um helpawl hai hin an sunghai inenkol theina dingin an thlatin hlaw sukpung pek dingin sorkar chu an nor a nih.

SoO hnuoia um helpawl hai chun sorkar hrietpui silai, identity card le bank account hai khom an cadre hai siem pek dingin sorkar an nor bok a nih.


Blog, Updated at: 7:02 PM
© TLÂNGSAM. Powered by Blogger.