Rajdhani rel chesuol, mi 4 thi

Posted by Lalremlien Neitham

Guwahati, June 26, 2014: Zani khan Bihar-a Saran district huom sunga Chapra bul lai vel New Delhi anthoka Dibrugarh pan Rajdhani Express chu a chesuol a, mi 4-in an hringna an chan a, mi 23 vel an hliem niin ei thu lakna chun a hril.

East Central Railway-a chief public relations officer Arvind Kumar Rajak chun, New Delhi-Dibrugarh Rajdhani Express coach 7 le power car chu Bihar khawpui Patna anthoka km 75 vela hlaa um Golden Ganj Station lai chun a chesuol a; zing dar 2:11 vel khan coach 5 le pantry car an let bok a nih, tiin a hril.

Coach ṭhenkhat chu rel lampui anthok feet 700 vel deu thaw-ah an hleng a; a hmun-ah mi 3 an thi a, pakhat chu hospital-ah a thi, tiin Rajak chun a hril bawk.

Railway Minister Sadananda Gowda chun rel chesuolna hmun-ah fe-in, rel chetsuol nasan chu sui ani ding thu a hril a; a thi hai sungkuo kuomah Rs. 2 lakh pei pek ding le na taka hliem hai kuomah Rs. 1 lakh pei le na taluo lo hai chu Rs. 20,000 seng pek ning an tih, tiin a hril.

Railway Board Chairman Arunendra Kumar hrildan chun, rel chetsuolnaa hin Maost helpawl hai kut an rol niin a hril a, “Anlang danin rel lampui hi bomb a suksiet a ni a, hi leia rel chesuol a nih,” tiin a hril.

Bihar chief minister Jitan Ram Manjhi ruok chun Maoist helpawl hai kuthnung ani naw thu a hril ve thunga, “Tuchen-ah bomb hmanga rel lampui suksiet ani ti sinsiena a um nawh. Railway hai thawsuol lem niin anlang,” tiin a hril.

Saran District Magistrate Kundan Kumar chun rel chesuol nasan hi Maost hai lei niloin ‘operational problem’ lei a nih, tiin a hril.

Rajdhani Express-in hi lai hmun hi a hraw hma’n minute 15 hma khan Kaviguru Express-in a hraw ve a, rel chetsuolna hmun hi hmun fienriel an naw a rel tlan zingna hmun a nih. Maost helpawl haiin rel lampui-ah bomb lo phuom tum hai sien khom olsam taka hriet thei ning a tih, tiin a hril bawk.


Blog, Updated at: 2:29 AM
© TLÂNGSAM. Powered by Blogger.