Mizoram-ah “Migration Certificate” la suoktu an pung

Aizawl, June 10, 2014: Mizoram Board of Secondary Education (MBSE) hotuhai chun Mizoram-a inchuklai haiin Mizoram puotienga inchukzom dinga an lak ngei ngei hlak “Migration Certificate” chu a kum telin la suoktu an pung pei niin an hril.

MBSE hotu hai chun, nikum 2013 khan Class 10 (HSLC) inchukzo, Mizoram puotienga inchuk zom ding leia “Migration Certificate” la zat chu mi 553 an ni a, tu kum 2014 hin tuchen-ah mi 521 an tling tah niin an hril.

Kum 2013 khan Class 12 pass, MBSE anthoka “Migration Certificate” la suok inchuklai mi 771 an um a, tu kum 2014 hin mi 1,045-in an lak suok taa, la suok tumtu khom an la um pei niin MBSE hotuhai chun an hril.

MBSE hotuhai chun, tu kum inchuklai exam petu an tam lei le hlawtling an tam leiin nikum nekin tu kuma “Migration Certificate” la suok an tamlem thu an hril a, “Migration Certificate” hi Aizawl khawpui chauh niloin Saiha le Chakma ADC huom sunga inchuklai tamtak hai khomin an lak suok ve niin an hril bawk.