June thla sung Tripura-ah malaria natnaa thi mi 55

Posted by Lalremlien Neitham

Agartala, June 30, 2014: Tuta thla sung khan Tripura-ah malaria natna hri a’nleng leiin mi sang chuong an damnaw a, mi 55-in an thipui a; a thi hai lai hin 46 chu naupang an nih, tiin Tripura health department spokesperson chun a hril.

“Malaria natna hri inleng lei le khawsik a damnaw mi 70,400 vel an naa, hieng hai lai hin mi 12,000 hai thisen a’nthok malaria natna hri hmu suok a nih,” tiin a hril.

“Damnaw hai po po hi damdawi In-a enkol vong an ni a, a thi zat sukchieng mi 55 hai lai hin 40% chu an chengna in-a thi an nih,” tiin a hril bawk.

Health department-a thuneituhai hrildan chun tulaia malaria natna hri inleng leia thi zat chu 85 a ni a, amiruokchu, a rengin sukchieng a la ninaw a nih.

Kar hmasak khan National Vector Borne Disease Control Programme (NVBDCP)-a mithiem hai chun Tripura-a malaria natna hri inlengna hmun hai sirna an lo nei ta bok a nih.

NVBDCP hai hrildan chun, kum 2010 khan malaria natna leia thi India-ah mi 1,018 an um a, kum 2011 khan mi 754, kum 2012 khan mi 519 le kum 2013 khan malaria leiin mi 440-in an hringna an chan bok a nih.


Blog, Updated at: 1:43 AM
© TLÂNGSAM. Powered by Blogger.