Bezburua Committee’n sin sunzom

Posted by Lalremlien Neitham

New Delhi, June 01, 2014: Delhi khawpuia Arunachali tlangval Nido Tania that ani zoa India sorkar thlungpuiin India khawpui hrang hranga Northeast mi haiin harsatna an tuok hlak hai inchuk dinga a’ndin Bezbarua Commitee chun voisun anthok an sin thaw sunzom nawk tang an tih, tiin ei thu lakna chun a hril.

India rama Lok Sabha inthlangpui um ding lei khan Ministry of Home Affairs (MHA)-in inthlang nei sung Bezbarua Committee-in an sinthaw chawl hri dinga an hriettir kha a nih.

Hi Committee hin India sorkar thar-a Minister of State for Home Kiren Rijiju khom an inhmupuia, thuchena an thil sui le hmu hai chu Union minister kuomah an hril ta thu hrilin, “Final report peklut ani theina dingin kan sin sunzom nawk tang kan tih,” tiin Committee chairman Bezbarua chun a hril.

Bezbarua chun, final report hi July thla bul vel-ah Union Ministry-a peklut an inbeisei thu a hril bawk. Lok Sabha Inthlangpui ding leia an sin sukchawl ani hma khan final report hi April thla lairawl vela peklut dinga ti kha a nih.

Bezbarua Committee hi NEC member le sorkar sin anthoka bang tah MP Bezbarua keihruoina hnuoia indin a ni a, member dang 12 an um bok a nih. Committee hin Delhi, Pune le Hyderabad khawpuia NE mihai an inhmupui nia hril a nih.




Blog, Updated at: 8:10 PM
© TLÂNGSAM. Powered by Blogger.