UDF ṭhalai ha’n Lal Thanhawla intum ani na thu-ah FIR thelut nawk

Posted by Lalremlien Neitham

Aizawl, May 05, 2014: Voisun khan Mizoram-a United Democratic Front (UDF) ṭhalai hai chun April 22-a Aizawl Police Station-a First Information Report (FIR) an thelut chu tu chenin hmalakna ala umnaw leiin Aizawl district SP kuomah an rang thei anga hma lak ani theina dingin FIR an thelut ṭha nawk.

UDF ṭhalai-in an FIR thelutnaa chun, kum 2013-a Mizoram MLA general election-a K. Chawnṭhuama-in Mizoram chief minister Lal Thanhawla le a thloppui haiin Electronic Voting Machine (EVM) sukchingpen na dingin Rs. 1080 lakhs velin mi 28 an tham tia intumna, kum 2008 September 2-a Saipum khuo kawllaia IRB hai lambun-naa sipai 4 an hringna an channa bak-ah mi dang pathum na taka an hliem naa Lal Thanhawla an hnamhnoih nia intumna, kum 2008-a Zomi Revolutionary Front (ZRF) haiin MLA hai vau ding le buoina siem dinga Lal Thanhawla’n a hmang nia intumna hai chu sui chieng dinga an phutna hai a nih.

Hiengang hi Lal Thanhawla le a thloppui hai chetdan nia intumna hai hi andik ani chun hieng neka suol turu le rapthlak a um chuong ta nawng a tih, tiin UDF ṭhalai hai chun an hril.

Hieng intumna hai hi andik le andik naw suichieng ani vat theina ding le thil suol thawtuhai chu tu khom nihai sien an phu tawk hremna pek ngei ani theina dingin FIR hi an thelut nawk niin an hril.


Blog, Updated at: 11:50 PM
© TLÂNGSAM. Powered by Blogger.