Tripura sorkar-in HC thurelna SC-ah khing ding

Posted by Lalremlien Neitham

Agartala, May 10, 2014: Tripura High Court-in zirtirtu sing chuong hai appointment a suktawp pekna thu-ah Tripura sorkar-in Supreme Court-ah HC thurelna chu khing a tih, tiin Tripura CM Manik Sarkar chun thuthar lakhawmtuhai kuomah a hril.

Liemtah May 7 khan Chief Justice Deepak Gupta keihruoina hnuoia Tripura High Court division bench chun, Tripura sorkar-in kum 2010 chena zirtirtu 10,323 kuoma sin alo pek changchang relin, hieng zirtirtuhai hai dan pangngai hraw loa sin pek an nih, tiin a suktawp pek a nih.

Tripura High Court-in Tripura sorkar kuoma chun, tu kum December 31 bo hma ngeia zirtirtu thar ruot nawk ding le thla hni sungin "employment policy" thar induon dingin a ti bok a nih.

Hienglai zing hin Tripura sorkar eptu pawl Congress, BJP le Tripura Pragatishil Gramin Congress (TPGC) hai chun Tripura HC thurel chu inpakin, candidate indiktak hai ta dinga rorelna lawmum ani thu an hril bawk.

Tripura sorkar-na cheltu CPM le a thloppui pawl hrang hrang hai le Tripura Employees’ Coordination Committee (HGB), Tripura Govt Teachers’ Association, DYFI le SFI hai ruok chun Tripura HC thurelna chu an dem ve thung.


Blog, Updated at: 4:53 PM
© TLÂNGSAM. Powered by Blogger.