Singjamei bomb puokah mi 2 thi, mi 8 an hliem

Posted by Lalremlien Neitham

Imphal, May 30, 2014 (HT): Zani zantieng dar 5:15 vel khan Singjamei Chingamakhong, Imphal West District-a Chingamakhong junction market shedah bomb a puok a, mi 2 an thi a, mi 8 an hliem.

Hliem hai laia mi 2 an hliem inrik hle a, hliemhai po po hi RIMS panpui vawng an nih. Tu pawl khawma bomb hi an sukpuok a ni thu an la puong nawh. Hi bomb puoka hliem hai lai hin Nga zawrtu nuhmei pakhat a ṭhang. Mi 2 thi hai laia pakhat chu a hmuna thi a ni a, pakhat chu RIMS Hospital panpui a ni mek laia thi a nih. Bomb puoka thi hai chu Samchan Rai (30) s/o (L) Shenaha Rai le Arvind Rai (20) s/o Sakaldeep Rai hai niin Bihar-a Motipur Babanidev khuo mi ve ve, tuta Chingamkha, Imphal hmuna cheng le khawsa mek an nih. An ruong hi RIMS Morguea sie a nih.

Manipur CM O.Ibobi Singh chun Bomb puoka hliemna tuok hai hi RIMS Hospital-ah a va kan a, bomb sukpuoktuhai a dem hle thu a puong. CM in hliem hai a va kan huna hin I. Hemochandra, Minister Public Health Engineering Dept.; K. Govindas, Minister Industries le Agriculture Minister Md. Nasir han an zui ve. Hi bomb puok le inzawm hin zanita Home Minister chel thar Mr Rajnath Singh chun Manipur CM O.Ibobi Singh chu telephone in a hung biek a, bomb sukpuoknaa inrawlna nei hai chu man ngei dingin a hung inhriettir bakah law & order enkawltu dingin security huntawk sie dingin an hriettir.


Blog, Updated at: 11:21 PM
© TLÂNGSAM. Powered by Blogger.