Sikul bomb-tuhai sui dinga ngen

Posted by Lalremlien Neitham

Hailakandi, April 30, 2014: Hailakandi district police hai chun Mizoram-a Kolasib district police hai kuoma chun lekha thonin, Thawleni April 29-a Assam le Mizoram ramri bul Hailakandi district huom sunga sikul pakhata bomb sukpuok le inzomin “high level inquiry” nei dingin an ngen.

Bomb sukpuokna kawllaia um hai chu bomb hi Mizoram mi haiin an sukpuok nia an ringhlel leiin Hailakandi SP Brojenjit Singha chun Kolasib police hai chun suichienga, a thawtuhai hi hrechieng dingin a ngen thu ei thu lakna chun a hril.

Bomb sukpuokna hi Kachurthal Lower Primary School-ah a ni a, Hailakandi hmunpui anthoka km 90 vela hla a um a nih. Mizoram le Hailakandi hin km 80 vel ramri an inṭawm a nih. Assam le Mizoram ramri buoina hi kum 2004 anthoka inṭan ta ana, tulai hnai el khom khan Assam police le forest mihai chu Mizoram-a Buhchangphai-ah lutin sinthawtuhai in le lo an suksiet nghe nghe bok a nih.

Kolasib le Hailakandi DC le SP hai chun an ramri lai buoina a suok zuol nawna dingin police patrolling nasa nawk zuola nei dingin an inbiek niin ei thu lakna chun a hril.


Blog, Updated at: 11:07 PM
© TLÂNGSAM. Powered by Blogger.