May 7 anthok Imp-Jiri inkar chakka bandh

Posted by Lalremlien Neitham

Imphal, April 30, 2014: Tamenglong-a Joint Forum for Transport Welfare (JFTW) hai chun hung tlung ding May 7 zan dar 7 anthok khin tiemchin umloin Imphal le Jiribam lampui-ah “chakka bandh” an puong.

JFTW chun thusuok siemin, hun sawt tak anthokin Khongshang le Tamenglong district headquarter inkar lampui km 39 a sei chu siemṭha dingin Manipur sorkar a nor taa, nisienkhom tuchen hin siemṭhat ala ni naw zing leiin an lungawinaw inentirna’n “chakka bandh” hi an ko thu an tarlang.

Hi “chakka bandh” hin PWD le NF Railways Construction Company hai sinthaw khom huomsa vong a tih, tiin an hril.

Hi lampui siemṭhat ding hin Manipur sorkar chu voi iemanizat ngen an taa, Tamenglong-a pawl hrang hrang hai chun April 17 khan CM kuoma joint memorandum an pek nghe nghe a, CM chun an thil phut chu April 27 chen an tiem hnung khomin tuchen hin la sukpuitling an naw thu an tarlang bawk.

Memorandum an thelut a chun hi lampui siemṭhatu ding hin State PWD hai niloin BRTF hai chu mawphurna pe dingin an ngen thu an hril bawk. Khongshang lampui sukzauna dingin ram neituhai kuomah zangnadawmna pe dingin an ngen bok thu an tarlang.

“Chakka bandh nei sung hin iengthil khom tlung sienla, Manipur sorkar in maw phur a tih,” tiin an thusuok chun a tarlang bawk.


Blog, Updated at: 10:49 PM
© TLÂNGSAM. Powered by Blogger.