Passport hnina-ah document indiklo pek hlak

Posted by Lalremlien Neitham

Aizawl, May 20, 2014: Mizoram-a passport office-a deputy passport officer H. Lalramliana chun, ram danga sin pe thei le thon suok thei anga inhril pawl pahni/pathum hai leiin Regional Passport Office, Guwahati-ah Mizo hming an thang mawinaw ṭan mek niin a hril.

Deputy passport officer-in a hril danin, ram danga sin pe thei anga inhril mi ṭhenkhat ha'n an hnuoia sin hnituhai chu passport an buoipui pek a, thawdan pangngaiin an hni pek ngam naw a, inhmaw deu thila passport hnina ‘Tatkaal’ angin Guwahati-ah an hni pek hlak thu a hril.

H. Lalramliana chun, ram danga sin buoipuituhai chun an sumdawngna thil leiin document indik chie nilo hmangin passport an hni pek hlak ti a hril a, “Hieng ang hi Guwahati-a endiktu ha’n man suok an nei ta hlak a, hnam angin mi entleu pal an tih ti inlau a um hle a nih,” tiin a hril.

A hril pei dan chun, state ṭhenkhat anthoka passport hnituhai chu ringhla an hlaw bik hlak a, asanchu document tehlem hmu ding a tam lei ani thu a hril a, “Chuleiin nakie pei-ah chuong ang State hai anga Mizoram anthoka passport hnitu ha’n ringhla an hlaw le an buoipui sung a suksawt pha inlau a um tak zet a nih, tiin a hril. Passport hnina lekha poimaw dang dang – matric certificate, birth certificate, etc hming ziekdan inang naw leiin passport hnina hnawl ani hlak thu a hril bawk.

Mizoram anthoka passport hnitu, document tehlem hmang leia man suok hai chu blacklist-ah an um ti H. Lalramliana chun a hril a, passport hnina kong-ah Mizo ha’n harsatna tuok pal an tih, ti an lau thu a hril bawk.

Passport hni dan hi chi hni a um a, ‘normal application’ le ‘tatkaal’ a nih. Normal application chu hni dan pangngai a ni a, a sukfel sung a sawt bik deu. Tatkaal chu inhmaw deu thila passport hnina a ni a, sukfel dingin Guwahati-ah fe a ngai hlak a nih.


Blog, Updated at: 9:58 AM
© TLÂNGSAM. Powered by Blogger.