Pasal 1 le nuhmei 2 gelatine bomb le man

Diphu, May 14, 2014: Zani khan Assam-a Karbi Anglong district huom sunga Diphu rel station a chun police haiin pasal pakhat le nuhmei pahnih an man a, an kuoma inthokin bomb iemanizat an man sa bawk.

Police hai hrildan chun, hieng an i man mi pathum – Thanga Mizo (k. 30) le a nuhmei Opoi Mizo le an chuongpui Rody Parate (k. 28) – haia inthok hin gelatin bomb pack 27 (tluon 648) le a hrui meter 90 a sei an man niin an hril.

An i man mi pathum hai hi Dilaji, Diphu khaw mi niin police hai chun an hril bawk.

Police hai hril pei dan chun, gelatine bomb le a hrui hai hi Guwahati anthokin Janasatbadi Express relin Diphu an hung phur niin an hril.

Police hai i man nuhmei pahni hai chun an inhnamhnoih naw thu an hril ve thung.