India inthlangpui tawpna nei zo

Posted by Lalremlien Neitham

New Delhi, May 13, 2014: Tu kuma India rama Lok Sabha inthlang tawpna ding chu zani khan State 3 – Uttar Pradesh, West Bengal le Bihar – a hai nei zoin 16th Lok Sabha Election 2014 chu zo alo ni tah.

Zani a Uttar Pradesh-a inthlangnaa khan MP seat 18 inchu a ni a, West Bengal-ah 17 le Bihar-ah 6 inchu a nih. Hieng State 3-a seat 41 inchunaa hin candidate 606 an ngir a, vote nei mi 9 crore an chuong a nih. Candidate hai laia a langsar pawl deu hai chu Bharatiya Janata Party (BJP) prime minister candidate Narendra Modi, Aam Aadmi Party (AAP) hotu Arvind Kejriwal le Samajwadi Party (SP) hotu Mulayam Singh Yadav hai an nih. Kejriwal hin Modi chu Vanarasi-ah a khing a nih.

Tu kuma Lok Sabha inthlangna hi ṭum 9 a ṭhe niin, April 7 anthok May 12 sung khan nei a nih. State tina inthlangnaa vote tla zat po po belkhawmin vote 66.38% a tla a nih. Kum danga Lok Sabha inthlangna nei ta po po nek khan tu kuma vote tla zat hi ala tam tak a nih. Kum 1984-a India prime minister that zoa inthlangnaa khan vote 64.01% a tla a, tu kuma inthlangna hin a khum a nih. Lok Sabha inthlang hnuhnung tak kum 2009-a nei a khan vote 58.19% a tla a nih.

Tu kuma Lok Sabha-a MP seat ruok zat a rengin 543 a ni a, India sorkar laipui siemna dingin party hai chun seat 272 an mamaw a nih. India pumpuia vote nei zat 814.5 million an um a, khawvel rambung pakhata vote nei tamna tak a nih. Inthlangna hmun 9,30,000-ah Electronic Voting Machine (EVM) 1.4 million hmang a nih.

Tu kuma Lok Sabha inthlangnaa vote tla hai po po tiemna hi Zirtawpni May 16 khin a ruolin State tin-ah nei ning a ta, hi ni vek hin result puong ni bok a tih.


Blog, Updated at: 9:20 PM
© TLÂNGSAM. Powered by Blogger.