NSCN (IM)-in inzorna le lamna hmun khap

Posted by Lalremlien Neitham

Dimapur, May 07, 2014: Naga helpawl NSCN (IM) chun Naga hai umna hmuna hai inzorna hmun le lamna hmun hai chu nun sukporchena'n hmang an hlak leiin a khap thu a puong.

Naga hai khawvel nun a porche tak zietzie ngaimawin, NSCN (IM) chun liemtah Zirtawpni May 2 anthok khan inzorna hmun le lamna hmun hai chu khap dingin thuthlukna a siem a, bawzuitu dingin a Kilo (home) ministry chu a dande a nih.

NSCN (IM) chun thusuok siemin, Naga mipui, khawtlang pawl le kohran hai chu hieng nun sokporchena hai hi Naga khawtlang anthok sukbo ani theina dingin ṭhangruol ding le thlop dingin a ngen nghal bok a nih.

Hienglai zing hin Dimapur-a police le IRB haiin Nagaland-a sumdawngna hmunpui Dimapur khawpui-ah inzorna sukre tumin nasatakin ṭhang la hai sienkhom, rem tieng nekin zuol tieng a pan lem niin ei thu lakna chu a hril.

Nikum-a Dimapur chanchinbu pakhatin a suidan chun, Kohima a rikngot khom nuhmei inzor 4000 chuong an um niin a sui a, hienghai laia a chanve deu thaw hi a khawpui mi niin a hril.

Inzorhai laia sin thaw NGO pakhat chun mi 870 vel chauh inzor hlak nia inzieklut an um niin an hril. A tamlem hai chun an thilthaw thup an nuom leiin an inzieklut nuom naw a nih. Inzor hlak hai hi kum 16 le 40 inkar an ni tlangpuia hril a nih.

Ei thu lakna’n a hrildan chun, dan naranin inzorhai hi nunghak, nupui le pasal le inṭhe ta hnung hai an ni tlangpui a, college kai lai khom iemanizat an inzor hlak nia hril a nih. Dimapur district thuneituhai chauh niloin helpawl NSCN (IM) khomin inzorna hi sukre tumin nasatakin nikum anthok khan ṭhang alo lak ta hlak nia hril a nih.


Blog, Updated at: 2:45 PM
© TLÂNGSAM. Powered by Blogger.