Nk. Jeneth L. Varte in Lelte Award a dawng

Posted by Lalremlien Neitham

CCPur, May 08, 2014 (HT): May 1, 2013 nia ‘Mizoram Lelte Award’ semnaa Hmar hlasakthiem Nk. Jeneth L. Varte chun Award a dawng ve. Nk. Jeneth L. Varte hi May 4, 2014 khan CCPur a hung tlung nawk tah.

Nk. Jeneth hi ‘Zogam Artiste Association’ hai huoihawtnain Buallian khuo kawl Prayer Station-ah mipui tam takin an lo tuok a, Chawimawina parṭhi le ditsakna thilpek hai inhlanin, lawmna hunser an hmangpui. Hi hunser hmangnaa hin Pu Langkhanpau Guite, Chairman, ADC, CCPur chun thuhrilna neiin hiengang chawimawina dawngtu hi lawmpui thu le hmatieng peia khawm hlawltingna chang pei dinga a ditsak thu hrilin thilpek an hlan a, Pu Thangthuam, President, ZAA khawmin thu a hril bakah Nk. Jeneth L. Varte khawma lawmthu hrilna a nei a. Mipui tam takin an lo welcome na chungthuah lawmthu hrilin “Lelte Award 2014” semna a an hun hmang dan hrilin hiengang ei lawmnahai ei inlawmpui tuona hi hnam inpumkhatna siemtu hmangruo ṭha tak a ni thu a hril.

Nk. Jeneth hi ‘Zogam Artiste Association’ haiin a chengna In Saikawt EFCI compound chen an va thak a, Rev. Jessai Neitham D/S Saikawt Dist. in welcome speech le lawmthu hril ṭawng-ṭaina a nei.

Mizoram Lelte Award semna hi Vanapa Hall a hmang a ni a, hi huna hin Aizawl hmuna Hmar nau mi tam takin Nk. Jeneth hi an va ṭawiawm. Nk. Jeneth hin Trophy le Citation a dawng zovin Lusei le Hmar ṭawngin lawmthu hrilna a nei a. Hall sung mipui ri a ṭha hle. Chu zovah Hmar devotional song thiem tak le hring takin a sak a, mipui lungril a hne hle. Nk. Jeneth Varte hin ei hnam le Pathien a chawimawi hle a nih.

Paite Community-ah Mwanlal Tunglut khawmin ‘Lelte Award 2014’ hi a dawng ve a, ama le Mwanlal Tunglut hai lawmlutna hunser hi ZAA in an hmang a nih.


Blog, Updated at: 5:10 PM
© TLÂNGSAM. Powered by Blogger.