June 2 anthok Delhi University admission form

Posted by Lalremlien Neitham

New Delhi, May 08, 2014: Thla thar June 2 anthok 16 sung khin Delhi University (DU) hnuoia college 65 haia under-graduate course hrang hrang inchuk nuom hai ta dingin application form pek suok ṭan ning a tih. DU hnuoia college a hai hin seat 54,000 vel a um niin ei thu lakna chun a hril.

Nikum ang bokin tukum khom Centralised Form hmang nawk ning a tih. Chu umzie chu admission thaw ding haiin an College kai nuomna a tam thei ang tak an apply thei ding tina a nih. Chun, English subject la ding hai ta dingin entrance test buotsai hlak chu tu kum thaw ninaw nih. Admission hi online le offline in peklut thei ning a ta, first cut-off list hi June 24 anthokin suksuok ṭan ning a tih.

Tuta ṭum hin vocational course la nuom hai ta ding khomin UG course lak thei ni bok a tih. Amiruokchu, subject tina an hmu insangtakna subject pali hai anthoka belkhawmin 10% pei peithlak ning a tih.

Hindi journalism, social work, Spanish, German, French le Italian la nuom hai ta ding khom entrance exam um nawng a ta, an mark hmu rawn takna subject 4 hai belkhawmin admission pek ning a tih.

Offline centralized admission form hi SC/ST ta dingin Rs. 70 a inchawk thei ning a ta, mi dang hai ta dingin Rs. 150 ning a tih. Online khomin admission form hi submit thei ning a ta, SC/ST ta dingin Rs. 70, a dang hai ta dingin Rs. 100 ning a tih.

Form hai hi centre 18 a inchawk thei ning a tih. North le South Delhi-ah college 5 anthok inchawk thei ning a ta, East & West Delhi-ah college 3-ah le Central Delhi-ah college 2 anthok inchawk thei ning a tih.

“Tukum hin cutoff list voi 5 um a ta, course ṭhenkhat sukbit lo a um chun cutoff voi 5 nei nawk ning a tih. Cutoff tawpna, a 10-na hi July 21-a insuo ning a tih. Cutoff hmasa lem hi admission le fee pekna hun ding ni 3 sung ning a ta, a hnuhnung lem a ding hin ni 2 ning a tih,” tiin JM khurana, DU’s dean of student’s welfare chun a hril.


Blog, Updated at: 6:16 PM
© TLÂNGSAM. Powered by Blogger.