Nagaland CM thar dingin TR Zeliang-in thusam nei

Posted by Lalremlien Neitham

Kohima, May 25, 2014: Nagaland MP thlangtling thar Neiphio Rio chun Nagaland chief minister a nina anthokin an ban leiin a thlaktu dingin Naga Peoples Front (NPF) hotu kum 62-a upa TR Zeliang chu Nagaland chief minister thar dingin karliem tah Zirtawpni khan governor Ashwani Kumar-in Raj Bhavan-ah thu insamna an nei tir a, ama ruolin mi 11 dang council of minister-ah laklut bok an nih.

NPF i ṭhuoi Nagaland sorkar-na cheltu Democratic Alliance of Nagaland (DAN-III) hi a voitumna dingin kum 2013 March khan Nagaland sorkar-na an chel ṭan a nih. Nagaland CM hlui Neiphio Rio chu kum 11 sung zet Nagaland CM a chel hnungin Zirtawpni khan CM sin anthok alo inban ta a nih. Tuta ṭuma Lok Sabha inthlangnaa khan Neiphio Rio hi Nagaland anthoka MP dinga thlangtling a nih.

Zeliang hin a thokpui ding mi 11 hai lai mi 6 dang cabinet minister dingin a laklut a, a dang mi 5 hai chu Rio’n CM a chel laia cabinet minister sin lo chel ta reng an nih.

Zeliang hi kum 40 chuong Nagaland politics-ah a ṭhang taa, Nagaland sorkar-ah voi iemanizat minister sin khom alo chel ta bok a nih.

TR Zeliang hi Peren district-a Mhaupungwa khuo-ah a pieng a, Dibrugarh (Assam) anthok Don Bosco School inchuk zoin, kum 1976 khan Kohima College-ah anchuklai Peren district anthok Youth Congress president-a thlangtling a ni a. Kum 1982 le 1987 khan MLA biel inthlangna-ah ngir ve-in a hlawsam ve ve a, kum 1989 khan Naga Peoples Council hmingin ngir nawkin Tening biel anthoka thlangtling niin Information and Public Relations, Tourism and Parliamentary Affairs mawphurna pek a nih.

A ṭhalai sung hin khawtlang thil dang dang-ah ṭhang ve-in kum 1975-79 sung khan Zeliangrong Students Union (ZSU) president sin a chel a, Zeliangrong Action Committee le Zeliangrong Youth Organisation a khom general secretary sin alo chel ta bok a nih. Ama hi Peren College co-founder khom ani nghe nghe bok a nih.

Kum 1993 khan Congress party-ah lutin Minister for Relief and Rehabilitation sin pek a nih.

Kum 1998 le 2003 khan Congress hmingin MLA inthlangna-ah ngir nawkin thlangtling a ni a, a hnungin NPF tieng an chawm nawk a nih.

Kum 2004 khan Rajya Sabha MP dinga thlang ani leiin State politics anthok hun iemanichen a chawl a, kum 2008 khan NPF hmingin MLA inthlangna-ah thlangtling nawk a ni a, ni kuma Assembly inthlangnaa khan hlawtling nawkin Neiphiu Rio sorkar-na hnuoi-ah Minister for Planning and Coordination, Evaluation, and Geology and Mining sin pek a nih.


Blog, Updated at: 11:44 AM
© TLÂNGSAM. Powered by Blogger.