Hrem inlau leiin sikul hostel anthok mi 26 tlan suok

Posted by Lalremlien Neitham

Imphal, May 25, 2014: Imphal Chanchipur-a Standard Robart Higher Secondary School hostel-a um sikul naupang 26 hai chu an zirtirtuhai hrem an inlau leiin an hostel anthokin an tlan suok niin ei thu lakna chun a hril.

All Manipur Students Union (AMSU) general secretary Laishram Reagan chun thuthar lakhawmtuhai an office-ah inhmupuiin May 24 zan dar 10:30 vel khan sikul naupang 26 hai chu an sikul hostel anthokin an tlan suok thu a hril a. Hostel anthoka tlan suok sikul naupang hai hi an sikul principal-in a zing dar 3 khan hostel tieng a ṭhuoi phei nawk ta niin a hril bawk.

Sikul naupang hai hrilna anthoka a hrilsawng dan chun, hieng sikul naupang hai hi class VII a inchuk a ni a, tui an insil ding tawmin principal room-ah ṭhuoi niin hmola vuok an ni thu an hril.

Sikul naupang hai tlan suok chu thudang nisien, panser um rak khopa vuok an ni thu a hin sikul thuneituhai dem a um hle a nih, tiin Reagaon chun a hril a, hieng anga inchuklai hai chunga kutthlakna hi Right to Education Act 2005 dan bawsietna khom a nih, tiin a hril.

Sikul naupang hai hi ṭongkam ṭhanaw hmang khum an ni bakah, inchuklai danghai hma-ah mawilo taka suk hmingsiet an ni bok a nih, tiin Reagon chun a hril a, sikul thuneituhaiin hostel naupang hieng anga an hremna kong-ah hrilfiena ṭha tak an nei a ngai thu a hril.

Hi thil hi an ṭan dan niawma hrildan chun, hostel-a um sikul naupang ṭhenkhatin an bu le hme fak an soisel a, thlaisuongtupa chun hostel enkoltu warden kuoma zuolkoin, hostel naupang hai chu na taka vuok an ni a. Hi hnung hin hostel naupang haiin thlaisuongtu le warden hai chu “paid servant” tiin an ko nia hostel thuneituhai kuomah soiselin, hostel-a um naupang 56 hai chuonganga kotuhai hrildok dingin vau an ni a. Hostel naupang hai chun hrem an ṭitna leiin hostel anthok tlan suok an tum a, mi 26 an tlan suok hman nia hril a nih.


Blog, Updated at: 5:37 PM
© TLÂNGSAM. Powered by Blogger.